Paıdalanylmaı jatqan kommertsııalyq maqsattaǵy jerler memleketke qaıtarylyp jatyr

NUR-SULTAN. QazAqparat – Paıdalanylmaı jatqan 200 gektar kommertsııalyq maqsattaǵy jer memleket menshigine qaıtaryldy. Bul týraly QR Aýyl sharýashylyǵy vıtse-mınıstri Ábilhaıyr Tamabek aıtty, dep habarlaıdy QazAqparat tilshisi.

Onyń atap ótýinshe, jergilikti ákimdikter 2019-2021 jyldar aralyǵynda kommertsııalyq maqsattarǵa berilgenimen áli kúnge paıdalanylmaı jatqan jalpy alańy 5,2 myń gektardy quraıtyn 3,5 myń ýchaskeni anyqtaǵan.

«Jer ınspektorlary den qoıý sharalaryn qabyldaǵannan keıin jalpy alańy 1,6 myń gektardy quraıtyn 1,2 myń ýchaskeniń ıeleri jerin paıdalanýǵa kiristi. Jalpy alańy 210 gektardy quraıtyn 320 ýchaske memleketke qaıtaryldy. Al jalpy alańy 3,4 myń gektar bolatyn 2 myń ýchaskeni memleketke qaıtarý jumystary júrgizilip jatyr», - dedi Ábilhaıyr Tamabek ortalyq kommýnıkatsııalar qyzmetindegi baspasóz máslıhatynda.