Paıdalanylmaı jatqan 1,85 mln gektar jer ıgerilýde - AShM
«Jaıylymdardyń jetispeýshiligi kezinde eldiń jer resýrstaryn utymdy jáne tıimdi paıdalaný máseleleri birinshi orynda turýy tıis. Osyǵan baılanysty, ótken jyly memleketke 5,2 mln gektar paıdalanylmaǵan jáne zańnamany buzý arqyly berilgen aýyl sharýashylyǵy jerleri qaıtaryldy. Tıisti sharalar qabyldanǵan soń jer paıdalanýshylar 1,85 mln gektar jerdi ıgerýge kiristi. Atalǵan kórsetkishter 2021 jylmen salystyrǵanda 10 ese kóp», - dedi E. Qarashókeev Úkimettiń búgingi otyrysynda.
Onyń aıtýynsha, mınıstrlik Prezıdenttiń 2023 jyldyń sońyna deıin paıdalanylmaı jatqan qosymsha 5 mıllıon gektar jerge qatysty shara qabyldaý tapsyrmasyn oryndaýda.
Sonymen qatar Aýyl sharýashylyǵy mınıstrligi men Tsıfrlyq damý, ınnovatsııalar jáne aeroǵarysh ónerkásibi mınıstrligi birlesip, 2022 jyly memleketke qaıtarylǵan aýyl sharýashylyǵy jerleriniń ınteraktıvti kartasy – jerkarta.gharysh.kz geoservısin ázirlep, iske qosty.
«Osylaısha, jalpyǵa qoljetimdi ınteraktıvti karta azamattardyń aýyl sharýashylyǵy jerlerine quqyq berý týraly jergilikti atqarýshy organdarǵa ótinish berýlerine baǵdar bolady. Jyldar boıy paıdalanylmaǵan aýyl sharýashylyǵy jerlerin aınalymǵa tartýǵa, aýyl sharýashylyǵymen aınalysý úshin turǵyndardy qajetti ýchaskelermen qamtamasyz etýge negiz bolady. Interaktıvti kartany engizý aıtarlyqtaı dárejede áleýmettik áser beredi, jer ýchaskelerine qatysty alaıaqtyq protsesterdi azaıtady jáne paıdalanylmaı jatqan jerlerdi qaıtarý boıynsha memlekettik apparat jumysyna halyqtyń baǵasyn alýǵa oń áser etedi», - dedi erbol Qarashókeev.
Aıta keteıik, Qazaqstannyń 15 oblysynda mal jaıý úshin 8,9 mln gektar jer jetispeıdi. Bul kóbinese jeke qosalqy sharýashylyqtarda mal sanynyń aıtarlyqtaı ósýine baılanysty.
Buǵan deıin habarlanǵandaı 5 mln ga bos jatqan aýyl sharýashylyǵy jerleri memleket menshigine qaıtaryldy.