Pavlodarlyqtar Elbasy Joldaýyn talqylady
Shara barysynda sóz alǵan oblys ákiminiń birinshi orynbasary Ulan Jazylbek Nursultan Nazarbaevtyń aıqyndap bergen 10 negizgi baǵytyn el ekonomıkasynyń damýyna jasalǵan naqty jospar ekendigin atap ótti.
«Búgingi kúnge deıin Qazaqstannyń jetistigi úshin kóptegen qadamdar jasaldy. Elimizge damýdyń jańa sapasy kerektigin bárimiz jaqsy túsinemiz. Bul Joldaý - tórtinshi ónerkásiptik revolıýtsııa jaǵdaıynda bizdiń odan ári jasaıtyn is-qımyldarymyzdy belgileıdi. Biz, Pavlodar oblysynyń eńbekqor, jasampaz halqy, el azamattary Nursultan Nazarbaevtyń Táýelsizdik mereıin ústem etetin kemel bastamalaryn árdaıym qoldaımyz. Qazaqta «jumyla kótergen júk jeńil» deıdi, sondyqtan elimizdiń erteńi baıandy, damyǵan 30 memleketpen terezesi teń bolý úshin árbirimizdiń qajyrly qaıratymyz kerek», - dedi Ulan Jazylbek.
Joldaýdy talqylaý barysynda birqatar memlekettik mekemelerdiń, kásiporyndar men bilim oshaqtarynyń basshylary óz oılaryn ortaǵa saldy.
«Áleýmettik jeliniń jelisimen jeldeı esken aqparatty estı sala barsha otandastar sekildi Elbasy Joldaýyn muqııat oqyp shyqtym, - deıdi Pavlodar memlekettik pedagogıkalyq ýnıversıteti jastar saıasaty departamentiniń basshysy Erkebulan Kúntýǵan. - Jańa zamannyń jańa tehnologııalary men ınnovatsııalaryn qabyldaı otyra, ulttyq qundylyǵymyzdy, salt-sanamyzdy joǵaltpaýdyń basty qujaty - «Bolashaqqa baǵdar: rýhanı jańǵyrý».
Bıylǵy Prezıdenttiń Joldaýynda tsıfrlyq Qazaqstan baǵdarlamasyna mán berilgen. Biz, jastar buǵan tolyqtaı daıynbyz. Qýat Esenov, Madııar Aıtpaev, Erjan Ótkelbaev syndy daryndy jastar, ІT-mamandar qazirgi tańda Google, Apple sııaqty tanymal kompanııalarda jumys jasap júr. Bul - qazaqstandyq jastardyń álemdik suranysqa ıe ekendiginiń aıǵaǵy. «Bolamyn degen balanyń betin qaqpaı, belin bý» degendeı, jańa Joldaý bizge jańa múmkindikterdi usynýda.
Aıta keteıin, dál búgin, 15-qańtar Pavlodar oblysynyń týǵan kúni, búgin bizdiń oblysqa 80 jyl tolyp otyr. Barlyq jerlesterimdi mereıli merekemen quttyqtaımyn!».