Pavlodarlyq jastardy qoldaý jobalaryna Tuńǵysh Prezıdent qory atsalysady

PAVLODAR. QazAqparat - Pavlodar qalasynda QR Tuńǵysh Prezıdenti - Elbasy qorynyń kúnderi ótkizildi, dep habarlaıdy QazAqparat.

Maqsat - oblys ákimdigimen birlese Memleket basshysynyń talantty jastardy qoldaýǵa baǵyttalǵan ıdeıalaryn nasıhattaý, qor jobalaryna Pavlodar oblysynyń jastaryn qatysýǵa shaqyrý.

Tuńǵysh Prezıdent qorynyń jumysymen tanysý onyń ókilderiniń oblys ákimi Bolat Baqaýovpen kezdesýden bastaldy. Onyń barysynda atqarýshy dırektordyń orynbasary Igor Rogov Tuńǵysh Prezıdent qorynyń qyzmeti týraly aıtyp berdi. Sondaı-aq taraptar birlesken jobalarǵa jastardyń atsalysýyn talqylady.

«Biz jylyna 100-ge jýyq joba ótkizemiz. Olar adamı kapıtaldyń jınaqtalýyna, básekelestigin joǵarylatýǵa jáne qazaqstandyqtardyń jańa generatsııasyn qalyptastyrýǵa baǵyttalǵan. Bizder ǵylym, mádenıet jáne ınnovatsııanyń damýyna qyzyǵýshylyq tanytatyn jas daryndarǵa kómektesemiz. Bul baǵyttardyń barlyǵy Qazaqstan Prezıdenti N.Á. Nazarbaevtyń Jastar jylynyń ashylý barysynda aıtqan ıdeıalarymen jáne qoıylǵan mindettermen sáıkes keledi», - dedi ol.

Óz kezeginde oblys ákimi B. Baqaýov aımaqta óskeleń urpaqty qoldaýǵa arnalǵan sharalar týraly málim etti. Bıyl 500-ge jýyq áleýmettik jáne mádenı shara ótkizý josparda bar. Sonyń ishinde jastardy jumyspen jáne úımen qamtý máselesine basymdyq beriledi.

Taraptar jastardy qoldaý maqsatynda qarym-qatynasty nyǵaıtýǵa jáne yntymaqtastyqty qalyptastyrýǵa kelisti.

Kezdesý sońynda qor atynan «Jastardyń bastamalaryn damytý ortalyǵyna» kompıýterlik quraldar alý úshin 3 mln teńge kólemindegi sertıfıkat tabystaldy.

Resmı kezdesýden soń S. Toraıǵyrov atyndaǵy Pavlodar memlekettik ýnıversıtetinde jastarmen kezdesý uıymdastyryldy. QR Tuńǵysh Prezıdenti qorynyń, QR Memlekettik tildi damytý qorynyń, qor janyndaǵy Jas ǵalymdar keńesiniń ókilderi jáne laýreattar qordyń sharalary men konkýrstary týraly aıtyp berdi, sheberlik saǵattar ótkizdi.

Nátıjesinde 400 pavlodarlyq jas QR Tuńǵysh Prezıdenti - Elbasy qorynyń jobalary men «Smart zholy», «Altyn tobylǵy», «Kim aqyldy?», «Bolashaq ǵalymdar», «Asyl mura» sekildi konkýrstar týraly tolyǵyq maǵlumat aldy, olarǵa qatysý joldarymen tanysty.

«Aıta ketý kerek, Pavlodar oblysynyń jastary Túńǵysh Prezıdent qorynyń jobalaryna belsendi qatysady. Osy kúnge deıin 60jas bizdiń konkýrstarymyzdyń jeńimpazy boldy, laýreat atandy», - delingen qordyń baspasóz habarlamasynda.

QR Tuńǵysh Prezıdenti - Elbasy qorynyń kúnderin oblystarda ótkizý dástúrge aınaldy. Jastar jylyn qor ókilderi Pavlodar oblysynan bastady.