Pavlodarlyq oqytýshylar jańa əlipbıge kóshý məselelerin talqylady

ASTANA. QazAqparat - Pavlodarda biliktilikti arttyrý boıynsha oqytý ortalyǵynda Elbasynyń «Rýhanı jańǵyrý» baǵdarlamasy aıasynda «Qazaq tilin jańasha jańǵyrtyp oqytýdyń áleýmettik máni men mańyzy» atty qazaq tili oqytýshylaryna arnalǵan onlaın semınar ótti, dep habarlaıdy pavlodarnews.kz.

Oblystyq tilderdi damytý basqarmasynyń habarlaýynsha, atalmysh sharada latyn grafıkasyndaǵy qazaq álipbıin oqytýda kezdesetin máseleler týraly onlaın-sabaqtar ótkizildi. Jalpyhalyqtyq reformany júzege asyrýdyń kezeńderi atap ótilip, dáris oqýshylar tyńdaýshylarǵa latyndy engizýdiń tıimdi ádisteri týraly aqparattar berdi. Onlaın semınarǵa oblystaǵy qalalar men aýdandardyń qazaq tili oqytýshylary men til mamandary qatysty.

«Josparǵa sáıkes memlekettik tildi meńgergen eresek turǵyndardyń úles salmaǵy 2014 jyly - 20%, 2017 jyly - 80%, 2020 jylǵa qaraı - 95% -ǵa jetýi tıis», - dedi pedagogıka ǵylymdarynyń doktory, L.N.Gýmılev atyndaǵy EUÝ qazaq til bilimi kafedrasynyń professory Shynar Qurmanbaeva onlaın rejıminde.

 «Qaztest» baǵdarlamasy boıynsha qazaq tilin bilý deńgeıin baǵalaý emtıhan tapsyrýdyń nátıjesimen anyqtalady. 2011-2020 jyldarǵa arnalǵan Qazaqstan Respýblıkasynda tilderdi damytý men qoldanýdyń memlekettik baǵdarlamasy aıasynda «Akkredıtteýden ótken Memlekettik tildi oqytý ortalyqtarynyń úlesi 2014 jylǵa qaraı - 30%, 2017 jylǵa qaraı - 70%, 2020 jylǵa qaraı - 100% bolady».

Semınar barysynda onlaın rejimi arqyly qashyqtyqtan qol jetkizý múmkindigin paıdalana otyryp, qazaq tili oqytýshylarynyń biliktiligin arttyrý, jańa ulttyq álipbıdi engizý jáne kóshý kezeńderinde kezdesetin negizgi aspektiler men máselelerdi sheshý joldary týraly aqparat berildi.