Pavlodarlyq oqýshylar dıabetke em bolatyn sýsynǵa patent aldy

ASTANA. QazAqparat - Pavlodar qalasy hımııa-bıologııa baǵytyndaǵy Nazarbaev Zııatkerlik mektebiniń 11-synyp oqýshysy Abylaıhan Káripbaı men 9-synyptyń oqýshylary Adel Kamaldınova, Azıza Kıreeva «Shaı sańyraýqulaǵy negizinde alynǵan dıabettik sýsyn» paıdaly modeli patentine ıe boldy, dep habarlaıdy pavlodarnews.kz.

Bul týraly agenttikke  bıologııa pániniń muǵalimi  Torǵyn Ǵınaıat aıtty.

«Sońǵy jyldary qant dıabetimen aýyratyn naýqastardyń sany artyp kele jatqany belgili. Sondyqtan aýrýdyń aldyn alý maqsatynda osyndaı paıdaly emdik sýsyndy ázirleýdi jón kórdik. Ǵylymı jetekshisi - bıologııa ǵylymdarynyń doktory, Pavlodar memlekettik pedagogıkalyq ýnıversıtetiniń bıotsenologııa jáne ekologııalyq zertteýler ortalyǵynyń dırektory, jalpy bıologııa kafedrasynyń professory Bıbigúl Jumabekova», - deıdi Torǵyn Ǵınaıat.

Onyń aıtýynsha, oqýshylar ǵylymı jetekshimen birge 2016 jyldyń qańtar aıynan 2017 jyldyń maýsym aıyna deıin  kóp jumys atqarǵan. Olar shaı sańyraýqulaǵyn ósirý ádisin zerttep, mıkrobıologııalyq zertteýler júrgizgen jáne nátıjesin ǵylymı maqalalarda jarııalaǵan. Shaı sańyraýqulaǵy negizinde alynǵan «Altyn batyr» dıabettik sýsynyna  lımon jáne túımedaq, qant jáne jasandy qant  qosylǵan.

Sonymen qatar tabıǵı sýsyndar óndirisiniń maketin qurastyrǵan. Óndiristik jaǵdaıda óndirýdiń tehnologııalyq jaqtaryn qarastyryp, óńirimizdegi ortalyqtardyń birinde eksperımenttik tájirıbe júrgizgen.

«Bul jobany daıyndaý úshin kóp ýaqyt pen kúsh jumsadyq. Túrli qalalarǵa baryp, jobamyzdy qorǵadyq. Júldeli oryndarǵa ıe boldyq. Bizdiń jobamen daıyndalatyn sýsynnyń paıdasy mol ekenine kúmánimiz joq. Onyń quramyna shaı, qant almastyrǵysh, sý jáne ashytqy kiredi. Tutynýshylarǵa unaıdy degen senimdemiz», - deıdi joba avtorlarynyń biri Adel Kamaldınova.

Joba jetekshileri paıdasy mol dıabettik sýsyndardy aldaǵy ýaqytta jergilikti dúkenderden satyp alýǵa bolatynyn aıtady.