Pavlodarlyq kondýktorlarǵa til týraly zań talaptary túsindirildi

PAVLODAR. QazAqparat - Pavlodar qalasynyń tramvaı basqarmasy jáne №1 avtoparktiń basshylarymen QR «Qazaqstan Respýblıkasyndaǵy til týraly» Zań talaptarynyń saqtalmaýyna baılanysty kezdesý uıymdastyryldy, dep habarlaıdy pavlodarnews.kz.

Bul týraly oblystyq tilderdi damytý basqarmasy monıtorıng jáne taldaý bóliminiń  mamany Samat Qushmaǵulov málim etti.

«Bıylǵy jyly turǵyndar tarapynan kondýktorlardyń memlekettik tilde qyzmet kórsetpeýine qatysty birneshe shaǵym túsken bolatyn. Osyǵan baılanysty turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimimen qyzmettik tergeý júrgizilip, eskertý nemese ákimshilik jaýapkershilikke tartý túrinde shara qoldanyldy. Bul  joly qalalyq  avtobýs parki men tramvaı basqarmasynyń 30 kondýktorynyń basyn qosyp, túsindirý jumystary júrgizildi.  Óńirlik ishki saıasat basqarmasy basshysynyń orynbasary Svetlana  Gladysheva qatysyp, ultaralyq syılastyq pen tatýlyqty saqtaý týraly aıtyp ótti», - deıdi Samat Qushmaǵulov.

Kezdesý barysynda QR «Qazaqstan Respýblıkasyndaǵy til týraly» Zań talaptarynyń saqtalýy jáne qoǵamdyq kólikterdegi kórneki aqparattardyń saýatty ornalasýy, halyqqa qyzmet kórsetý úrdisinde memlekettik tildi qoldanýdyń mártebesin asyrý, sapaly qyzmet kórsetý máseleleri talqylandy. Sondaı-aq, barlyq qatysýshylarǵa sózdikter men basqa da oqý-ádistemelik quraldar tabys etildi.