Pavlodarlyq qarııa respýblıkalyq bata berý baıqaýynda 1-oryn aldy

PAVLODAR. QazAqparat - Pavlodarlyq qarııa Baltabaı Syzdyqov respýblıkalyq bata berý baıqaýynyń júldegeri atandy, dep habarlaıdy pavlodarnews.kz.

Atyraý qalasynda ótken «Batamenen el kógerer» atty respýblıkalyq bata berý baıqaýyna elimizdiń 14 oblysy men Astana, Almaty, Shymkent qalalarynan 17 aqsaqal qatysty. Baıqaý erejesi boıynsha qatysýshylar 3 kezeńde synǵa tústi. Alǵashqy kezeńde bir tarıhı tulǵanyń batasyn berse, ekinshi kezeńde ózi daıyndaǵan batasyn berýge tıis boldy. Al, úshinshi kezeńde qorjynnan sýyrylǵan bılet boıynsha túsken taqyrypta bata berildi. Pavlodar oblysynyń namysyn QR Mádenıet qaıratkeri, Baıanaýyl aýdanynyń qurmetti azamaty Baltabaı Syzdyqov qorǵady.

«Aqpan aıynda oblysta ótken irikteý baıqaýynda jeńimpaz atanyp, respýblıkalyq jarysqa joldama alǵan bolatynmyn. Atyraýdaǵy saıysta birinshi Qashaǵan Kúrjimanulynyń uzatylǵan qyzǵa bergen batasyn aıttym. Ekinshi kezeńde óz jadymnan sýyryp jańa týǵan nárestege bata berdim. Úshinshi kezeńde qorjynnan «tul qalýǵa» baılanysty tapsyrma tústi. Esh múdirmedim»,- dedi Baltabaı Syzdyqov.

Baıqaýdyń qorytyndysy boıynsha bas júlde 80 jastaǵy almatylyq aqsaqalǵa buıyrdy. Al, 1-oryndy pavlodarlyq 74 jastaǵy Baltabaı Syzdyqov jeńip alyp, 750 myń teńge aqshalaı syılyqqa ıe boldy.

Eske salaıyq, aqpan aıynda Pavlodarda «Rýhanı jańǵyrý» baǵdarlamasy aıasynda ótken «Batamenen el kógerer» baıqaýynda 20 aqsaqal synǵa túsken bolatyn.

Foto: Darhan Ómirzaqov