Pavlodarlyq ájeler perzenthanada jas analarǵa besik jyryn úıretedi
Elimizde tuńǵysh ret uıymdastyrylyp otyrǵan sharanyń júzege asyrylýyna oblystyq Qazaqstan halqy Assambleıasy men Analar keńesi uıytqy bolǵan.
«Mundaǵy basty maqsat - rýhanı otbasylyq qundylyqtardy dáripteý, jas otbasylardy san ǵasyrlyq salt-dástúrlerdi aıalaýǵa baýlý jáne besik jyrynyń bala tárbıesindegi mańyzyn aıshyqtaý. Bizdiń aımaqta barlyǵy 24 etnomádenı ortalyq bar. Búgingi sharada qalalar men aýdandardan evreı, grek, slavıan jáne basqa da ortalyqtar besik jyryn oryndaýda. «El bolamyn deseń, besigińdi túze» dep halyq danalyǵy beker aıtylmaǵan. Bala tárbıesi besikten bastalady. Sondyqtan jas analarǵa besik jyrlaryn úıretý maqsatynda perzenthanalarǵa barýdy josparlap otyrmyz», - deıdi «Nur-Ana álemi» QB-niń tóraıymy Baqytjamal Maksılova.
Qoǵamdyq birlestik tóraıymy kelesi jyly bul festıval baıqaý retinde uıymdastyrylatynyn aıtady.
«Sondaı-aq, úıde bala tárbıesimen otyrǵan analardy qoldaý maqsatynda «Uly dalanyń órnekteri» dep atalatyn kórmege jergilikti qolónershilerdiń daıyndaǵan jumystary qoıyldy. Ol jerden ulttyq naqyshtaǵy quraq-kórpeler men zergerlik buıymdaryn tamashalaýǵa bolady. Jas qolónershilerdiń jumysyn ári qaraı damytyp, saýdasyn júrgizýge kómektesý úshin máslıhattyń depýttary da keldi jáne olarmen birge ártúrli jobalardy júzege asyrý joldary talqylandy. Aldaǵy ýaqytta jastarǵa kómek retinde Batyrmall oıyn-saýyq ortalyǵynan oryn alyp berý qarastyrylýda. Bul jastar úshin úlken qoldaý bolary sózsiz», - dep atap ótti ol.
Festıval aqyn Qabdikárim Ydyrysovtyń besik jyrynyń bar mán-maǵynasyn keńinen aıshyqtaıtyn óleńimen ashyldy. Budan keıin óńirdegi etnomádenı birlestikteri 12 tilde ártúrli etnos ókilderiniń ulttyq besik jyrlaryn oryndady.