Pavlodarlyq 400 oqýshy Golovkınniń qurmetine sap túzedi

ShARBAQTY. QazAqparat – Pavlodar oblysy, Sharbaqty aýdanynyń oqýshylary Gennadıı Golovkın men Saýl «Kanelo» Alvares arasyndaǵy jekpe-jek qarsańynda fleshmob ótkizdi, dep habarlaıdy QazAqparat Pavlodarnews.kz saıtyna silteme jasap.

400-den astam aýyl oqýshysy úsh «G» árpi túrinde alańda sap túzedi. Osylaısha balalar qazaqstandyq sportshyny qoldamaq bolǵan.

«Aktsııa barysynda qatysýshylar jalaýshalardy jelbiretip, «Alǵa, chempıon!« dep urandatty. Olar álem chempıony anyqtalatyn jekpe-jektiń bastalýyn taǵatsyzdana kútedi jáne bul chellendjdi ózderiniń qaharmany kórip, búkil el qoldaıtynyna senim bildirdi», - dedi Sharbaqty aýdanynyń ákimdiginde.

Eske salaıyq, Golovkın-Alvares jekpe-jegi 18 qyrkúıek kúni (astana ýaqytymen) Las-Vegastyń (SShA) T-Mobile Arena kesheninde ótedi.

Qazaqstandyqtar boks keshin «Qazaqstan» jáne «Qazsport» telearnalarynan tikeleı efırden kóre alady. Bastalýy – 18 qyrkúıek, saǵat 05:00. Basty aıqas shamamen 08.00-de bastalady.

GGG men «Kanelo»-nyń 2017 jyly ótken alǵashqy aıqasy tóreshilerdiń túrli daýysymen teń aıaqtalǵan edi. 2018 jyly bolǵan rematch tóreshilerdiń basym daýysymen Alvarestiń paıdasyna sheshildi. Trılogııa sýperorta salmaqta (birinshi jáne ekinshi kezdesýler orta salmaqta ótken bolatyn) ótedi. Qazir bul sanattaǵy barlyq chempıondyq tıtýl «Kaneloǵa» tıesili. Al Golovkınniń enshisinde WBA Super, IBF jáne IBO nusqalary boıynsha orta salmaqtaǵy beldikter bar.