Pavlodarlyq sport uıymdary mıllıondaǵan qarajatty tıimsiz paıdalanǵan - antıkor

<p>PAVLODAR. KAZINFORM - Pavlodarlyq sport mektebi ústel tennısine qajet 45 jabdyqty satyp alýǵa bolatyn qarajatqa nebári 6 ústeldi jaldap kelgen. Óńirdegi sport salasynan jalpy sany 15 jemqorlyq táýekeli anyqtalǵan.</p>

Bul týraly QR Sybaılas jemqorlyqqa qarsy is-qımyl agenttiginiń óńirlik departamentinen habarlady.

«Oblystyq Antıkor sport salasyndaǵy sybaılas jemqorlyq táýekelderine syrtqy taldaý júrgizdi. Taldaý barysynda sport basqarmasy men oǵan baǵynysty sport mekemeleri tekserildi. Nátıjesinde bıýdjet qarajatyn tıimsiz paıdalaný faktileri anyqtaldy. Kásibı klýbtardy qarjylandyrý kezinde, sport nysandary men jabdyqtaryn jaldaýda qarjylyq zań buzýshylyqtarǵa jol berilgen. Buǵan qosa sport razrıadtaryn berý, júldeli oryn alǵany úshin tólenetin syıaqy boıynsha kemshilikter, aqsha jınaý, jalǵan dıplommen jumysqa turý sııaqty zań buzýshylyqtar tirkeldi»,-dep habarlady departamentten.

Mysal úshin Aqsý qalasyndaǵy №2 balalar-jasóspirimder sport mektebi «DAAB GROUP» JShS-men 2022 jyldan beri jyl saıyn 6 ústel tennısin jalǵa alý týraly shart jasasyp kelgen. Ol úshin jyl saıyn 18 mln teńge jumsalǵan. Alaıda taldaý kórsetkendeı, bir ústel tennısiniń jıyntyǵy – 200-400 myń teńge turady. Álgi qarajatqa sport mektebi ústel tennısiniń kem degende 45 jıyntyǵyn satyp alýyna bolatyn edi. Mekeme osylaısha qatarynan birneshe jyl bıýdjet qarajatyn ysyrap etip kelgen.

Taǵy bir mysal, «Birlik» sport klýby segiz sportshynyń jolsapar shyǵyndaryna jarty mln teńgeden astam qarajat bólgen. Biraq olardyń sporttyq jıynǵa qatyspaǵany belgili boldy.

Jalpy syrtqy taldaý nátıjesi sport salasynan 15 jemqorlyq táýekelin anyqtady.

Eske sala keteıik, Antıkor pavlodarlyq kásipkerlerdiń 160 mln teńgeden astam qarajatqa shyǵyndalýyna jol bermedi.