Pavlodarlyq múmkindigi shekteýli azamat sheberhana quryp, kásip bastady

<p>PAVLODAR. KAZINFORM - Baıanaýyldyq Tasqaırat Jeńisov &ndash; ІІІ toptaǵy múgedektigi bar jan. Jigerli jas jýyqta bıznes-josparyn sátti qorǵap, memleketten bólingen qaıtarymsyz grantty utyp aldy. Aǵash sheberhanasyn ashyp, jergilikti turǵyndardyń tapsyrystaryn qabyldaı bastady.</p>

Jas kásipker byltyr «Bıznes bastaý» kýrsynan ótip, 1 mln 380 myń teńge qaıtarymsyz grant utyp alypty. Ol qarajatqa aǵash sheberhanasyna arnalǵan qural-jabdyqtardy aldyryp, dástúrli jınalmaly dóńgelek ústelder, oryndyqtar, esikter jáne t.b. ónimder jasaýǵa kirisip ketken.

«Reseıden aǵash kesetin, jonatyn, súrgileıtin, órnek salatyn 5 stanokty tapsyryspen aldyrdym. Bul kásipti bastaǵanda áýel basta qorqynysh bolǵan. Deıturǵanmen, buǵan deıin Astana qalasynda aǵash sheberhanasynda jınaǵan eńbek tájirıbem maǵan kóp kómek boldy. Stanoktar men qural-aspaptardy ıgergenimniń nátıjesin endi kórip jatyrmyn. Bala kezimde úı qoıandary men kógershinder ósiretinbiz. Olarǵa arnap torlar, úıshikter jasadyq. Aǵashtan buıym jasaý óneri sol kezden qalyptasyp qalǵan syndy. Qazir aǵashtan jáne faner kesikterinen túrli buıymdar jasap jatyrmyn. Eń áýeli jınalmaly dóńgelek ústeldiń jeńil túrin shyǵarǵym keledi. Kóptegen nusqalardy jasap kórdim, ázirshe tıisti nátıjege jetken joqpyn. Ústel alyp júrýge qolaıly, sapaly ári jyldam qurylatyn bolýy kerek», - dep óz kásibi jaıynda áńgimeledi Tasqaırat Jeńisov.

Ol óz kásibin qarapaıym ǵana garaj qoımasynda bastaǵan. Qarajatqa qol jetkizgen soń garajdyń tóbesin jóndep, edenine beton quıǵan. Elektr jelisi men jylý tartyp, qabyrǵalaryn jylý ustaǵysh materıaldarmen qaptapty. Endi óz tirligine alańsyz kirisip jatyr.

Foto: T. Jeńisovtiń jeke arhıvinen

Ázirshe sheberhanada jalǵyz ózi jumys isteıdi. Aıtýynsha, sapaly materıaldardy tabý qıyn. Jergilikti jerde aǵash óńdeıtin tsehtar joqtyń qasy, al syrttan keletin buıymnyń sapasyn tap basý qıyn. Elektr quraldary men usaq fýrnıtýralardy kóbine Pavlodar qalasyna baryp ákelip júr.

«Eń áýeli aýyl adamdaryn kúndelikti ómirine qajet buıymdarmen qamtamasyz etýdi uıǵaryp otyrmyn. Qazir turǵyndardan dala dárethanalary, dóńgelek ústelder, jumsaq oryndyqtarǵa tapsyrystar túsip jatyr. Kópten josparlap júrgen jumystarymnyń alǵashqy kezeńin eńserdim, endi keleshekte buıymdarymnyń assortımentin kóbeıtý kerek», - dep oı bólisti.

Foto: T. Jeńisovtiń jeke arhıvinen

Tasqaırat sóz sońynda qaıtarymsyz grant aýyldaǵy ózi sııaqty jastar úshin kásip ashýda mol kómek bolyp otyrǵanyn jetkizdi. Sheberhana ıesi aldaǵy ýaqytta qolynan is keletin azamattardy jumysqa qabyldap, kásibiniń aýqymyn keńeıtýdi josparlap otyr.