Pavlodardyń sý berý júıesi qalpyna keltirildi, alaıda qalanyń kóp bóligi áli de sýsyz otyr

<p>PAVLODAR. KAZINFORM - Oblys ortalyǵyn sýmen qamtý júıesine jaýapty kompanııa ókilderi sýdyń jaqyn ýaqytta qaıtadan qalpyna kele bastaıtynyn jetkizdi. Alaıda kópqabatty úılerdiń turǵyndary qubyrlar boıymen sý ázirshe júgire qoımaǵanyn aıtyp otyr.</p>

Buǵan deıin habarlaǵanymyzdaı, Pavlodar qalasynda sorǵy stansasynan aqaý shyǵyp, sý berý jumystary shekteldi. Saldarynan búgin túske qaraı Pavlodar qalasynyń kóp bóliginde sý berý toqtady.

Jurtshylyq dúkenderdegi aýyzsýdy japa-tarmaǵaı satyp alyp, kóp jerlerde sý tapshylyǵy baıqalyp qaldy. Kóshelerdegi sý aýyzsý qubyrlarynda uzyn-sonar kezek paıda boldy.

«Búgin saǵat 21.00-degi jaǵdaı boıynsha tehnologııalyq jabdyqtaǵy aqaý qalpyna keltirilip, qalaǵa sý berile bastady», dep habarlady «Pavlodar-vodokanal» mekemesi.

Alaıda sýmen qamtý mekemesi naqty qandaı jabdyqtyń isten shyqqany jaıynda ázirge tis jarmaı otyr.

Saǵat 22.30-da qalada jaǵdaı ózgergen joq. Turǵyn úılerdiń shamamen 80-90 paıyzy áli de sýsyz otyr.