Pavlodardyń ortalyq alańynda qulap qalǵan shyrsha bıyl qaıtadan qurylady
Ertis-Baıan óńirinde jańa jyldyq bezendirýler men is-sharalarǵa 262 mln teńge bólinip otyr.
- Bul qarajattyń 190 mln teńgesi Pavlodar qalasyna, 55 mln teńgesi Ekibastuz qalasyna, 6 mln teńgesi Aqsý qalasyna tıesili. Mereke qarsańynda úsh qalada jańa jyldyq jaryqtandyrýlar, jaryqdıodty kompozıtsııalar, sýburqaqtardyń dızaıny men jaryq elementteri ornatylady. Oblystyń qalalary men aýdandarynda qolda bar shyrshalar ornatylady. Sondaı-aq, qalalarda syrǵanaqtar ornatylyp, muz aıdyndary quıylady. Aýdan ortalyqtarynda bıyl ákimdiktermen ortalyq kóshelerdi jáne alańdardy jańa jyldyq bezendirýge jalpy somasy 16,5 mln teńgeden astam qarajat qarastyrylǵan. Dástúr boıynsha shyrshalar men muz syrǵanaqtary ornatylady. Negizgi jáne ortalyq kósheler jaryq elementterimen bezendiriledi,-dep habarlady oblystyq energetıka jáne turǵyn úı-kommýnaldyq sharýashylyq basqarmasynan.
Al óńirlik mádenıet, tilderdi damytý jáne arhıv isi basqarmasy keıbir jańa jyldyq is-sharalardy ótkizý úshin demeýshiler tartylatynyn málimdedi.
«Oblys ortalyǵynda Jańa jyldy merekeleý aıasynda 21 jeltoqsan kúni bas shyrshanyń shamdaryn jaǵý rásimi josparlanǵan. 2024 jyldyń 20 - 31 jeltoqsan aralyǵynda Pavlodar oblysynyń mádenıet mekemeleri men bilim berý uıymdarynda jeke kestege sáıkes Jańa jylǵa arnalǵan erteńgilikter, mádenı-saýyq is-sharalar ótedi. Óńirimizdiń qalalary men aýdandarynda merekelik is-sharalar, onyń ishinde kontserttik baǵdarlamalar, qoıylymdar, tańerteńgilikter, oıyn-saýyq baǵdarlamalar uıymdastyrylady»,-dep jaýap berdi mádenıet basqarmasynan.
Pavlodar qalasyndaǵy shaǵyn aýdandarda10 syrǵanaıtyn tóbeshik ornatylyp, 23 hokkeı alańy quıylady. Buǵan qosa qala ákimdiginiń qarajatyna – 6, kásipkerler esebinen 4 konstrýktsııa ornatylady. Oblys ortalyǵynda 30-dan astam is-shara josparlanǵan. 31 jeltoqsanda saǵat túngi 00.00-den 2025 jylǵy 1 qańtarǵa deıin Ertis jaǵasynda sporttyq jarystar ótkiziledi.
Eske sala keteıik, bıyl qańtar aıynda Pavlodarda 52 mln teńgeniń shyrshasy qatty jelge shydamaı omaqasa qulaǵan.
Qala ákimdigindegiler atalǵan shyrshanyń konstrýktsııasy qalpyna keltirilgenin málimdedi.
«Pavlodar qalasynyń bas shyrshasyn ornatýdy «ERTIS SU PVL» kommýnaldyq memlekettik kásiporyn júrgizetin bolady. Qazirgi ýaqytta bas shyrshanyń buzylǵan elementterin qalanyń kommýnaldyq kásiporyndary qaıta qalpyna keltirdi. Ony ornatý jeltoqsan aıynda josparlanyp otyr»,-dep habarlady ákimdiktiń baspasóz qyzmetinen.