Pavlodardyń 6 aýdanynda órtke qarsy is-sharalar durys uıymdastyrylmaı otyr

<p>PAVLODAR. KAZINFORM &mdash; Jergilikti ákimder jazǵy kezeńge daıyndyqtaryn tıisti deńgeıde júrgizbegen. Erikti órt sóndirýshiler qurylymy keıbir jerlerde múlde qurylmaǵan.</p>

Óńirlik tótenshe jaǵdaılar departamentiniń bastyǵy Jasulan Jumashev órt qaýipti kezeńge daıyndyq jumystarynyń barysyna qatysty alańdaýshylyq tanytyp otyr. Aıtýynsha, keıbir aýdandarda tilsiz jaýǵa qarsy ázirlik oıdaǵydaı emes.

— Aýdandarda erikti órt sóndirýshiler qurylymyn qurý týraly tapsyrmany barlyǵy biledi. Soǵan qaramastan búginde Aqtoǵaı, Baıanaýyl, Ertis, Sharbaqty, Pavlodar, Aqqýly aýdandarynda mundaı jumystar júrgizilmegen. Jergilikti ákimdikterdegi baqylaýdyń joqtyǵynan osyndaı salǵyrttyq týyndap otyr dep oılaımyn, - deıdi ol.

Oblysta búginde 57 órt sóndirý beketi, 59 túrli tehnıka, 140 qyzmetker bar. Olar jalpy sany 115 myńnan astam adam turatyn 263 eldi mekendi órtten qorǵaýǵa jumyldyrylǵan. Bıyl taǵy bes aýdanda órt sóndirý beketteri paıda bolady. Atap aıtqanda, Baıanaýyl aýdanynyń Birlik aýylynda, Aqtoǵaıdyń Qojamjar, Ertistiń Severnoe, Jelezınniń Veselaıa Roşa, Tereńkóldiń Lvovka eldi mekenderinde salynady.

Qazirgi kúni aımaqta 1703 adamnan turatyn 126 erikti órt sóndirýshiler qurylymy jumys isteıdi.