Pavlodardaǵy jańa kanal keler kóktemde iske qosylady

<p>PAVLODAR. KAZINFORM - Ertis-Ýspen kanaly alǵashqy bette 1,4 myń gektar egistikti tirshilik nárimen qamtamasyz etedi. Oǵan qazirdiń ózinde Pavlodar aýdanynyń eki sharýa qojalyǵy qosylyp úlgergen.</p>

Qurylysy biraz ýaqytqa sozylǵan Ertis-Ýspen sý arnasy keler jyly aıaqtalady.

- Kanaldyń sý keletin negizgi arnasy aıaqtaldy, endi tek ortadaǵy bógetti ashýymyz kerek. Sorǵy jáne elektrmen qamtamasyz etý jelilerin montajdaý jumystary jalǵasyp jatyr. Mıchýrın aýylynda podstansa qoıylyp, iske qosý jumystary júrgizilýde. Buǵan qosa 11 shaqyrym magıstraldy kanal qaptalyp, 6 avankameranyń 3-ýi tapsyryldy. Sý 2025 jyldyń mamyr aıynda jiberiledi,-dep atap ótti «Qazsýshar» RMK «Qanysh Sátbaev atyndaǵy kanal» fılıalynyń dırektory Ádilbek Shapatov.

Kanal alǵashqy bette 1,4 myń gektar sýarmaly egistikti tirshilik nárimen qamtamasyz etedi. Kanalǵa tehnıkalyq qyzmet kórsetetin Pavlodar aýdanynyń eki sharýashylyǵy oǵan qazirdiń ózinde qosylǵan. Olarǵa qajetti tehnıkalyq jaǵdaılar jasalǵan. Ertis-Ýspen kanalynan taǵy 12 fermer sý alýǵa nıetti. Bolashaqta kanal 10 myń gektar jerdi sýarýǵa múmkindik beredi degen jospar bar.

Eske sala keteıik, Ertis-Ýspen sý kanalynyń arqasynda jylyna qosymsha 500 myń tonna aýyl sharýashylyq daqyldaryn óndirý múmkindigi bar.