Pavlodardaǵy Uzynsý aýylyn topan sýdan qorǵaý úshin buzylǵan jol qalpyna keltirildi
Ertis aýdanynyń Uzynsý aýylynda jaǵdaı qalypqa túse bastaǵan. Búgin respýblıkalyq «Atameken-Ertis-Rýsskaıa polıana» jolynyń qazylǵan ýchaskesi qalpyna keltirilip, kólikterge qozǵalys ashyldy. Eske sala keteıik, 3 sáýir kúni atalǵan eldi mekendi qarǵyn sýdan qorǵaý úshin respýblıkalyq jol buzylǵan edi.
«TJD basshylyǵymen birge sý tasqynyna qarsy táýlik boıy kúres júrgizilip jatqan úsh aýylǵa bardym. Ertis aýdanynyń Aǵashoryn aýylynda erigen qar sýynyń aǵysyn burý jumystary júrgizildi. Sýdyń deńgeıi 35 sm-ge tómendep, bul sý basý qaýpin tolyǵymen joıýǵa múmkindik berdi. Uzynsý aýylynda da jaǵdaı qalypqa keltirildi. Búgin respýblıkalyq «Atameken-Ertis-Rýsskaıa polıana» jolynyń qazylǵan ýchaskesi qalpyna keltirilip, kólikterge qozǵalys ashyldy. Úsh úlken shuńqyr qazylyp jatqan Aqtoǵaı aýdanynyń Jalaýly aýylynda jumystar áli jalǵasyp jatyr. Oblys joldaryndaǵy barlyq aǵystar joıyldy. Óńirlik jumyspen qamtýdy úılestirý jáne áleýmettik qorǵaý basqarmasyna sý tasqynynan zardap shekkenderdiń barlyǵyna birjolǵy memlekettik áleýmettik kómek kórsetýdiń jedeldigin baqylaýdy tapsyrdym. Osy ýaqytqa deıin bıýdjetten tys qarajat esebinen 71 otbasyna keltirilgen zalal óteldi», - dep habarlady Pavlodar oblysynyń ákimi Asaıyn Baıhanov.
Al Pavlodar oblysynyń prokýratýrasy aımaqta jalpy sany 38 jeke úıdi sý basqanyn málimdedi. Oblystyq máslıhat depýtaty Asylbek Týǵanbaı Jalaýlydaǵy 14 úıdiń beseýi jaramsyz bolyp qalǵanyn, olardyń ornyna jańadan baspanalar salynatynyn jetkizdi.
«Qalǵan toǵyz úıdiń turǵyndaryna keltirilgen shyǵyn kólemine qaraı 3,5-6,5 mln teńge aralyǵynda qarjylaı kómek kórsetiledi. Uzynsý aýylyndaǵy zııan keltirilgen bes úıge de kómek qoly sozylady», - dep atap ótti ol.
Eske sala keteıik, buǵan deıin Pavlodardaǵy Uzynsý aýylynan 9 adam evakýatsııalandy.
Sý tasqynyna baılanysty Pavlodardyń bir aýylynda tótenshe jaǵdaı jarııalandy.