Pavlodardaǵy iri saýda jelisinde suly jarmasy 210 teńgege qymbat satylǵan

<p>ASTANA. KAZINFORM - Pavlodarlyq azamat qaladaǵy iri saýda jelisiniń birinen suly jarmasyn satyp alǵan. Taýar sóresinde sulyjarmasynyń quny 195 teńge dep kórsetilgenimen, kassada tutynýshyǵa 405 teńgege chek shyǵarǵan. Osylaısha saýda jelisinde taýar sórede kórsetilgen baǵadan 210 teńgege qymbat satylǵan. Artynsha turǵyn Pavlodar oblysy boıynsha saýda jáne tutynýshylardyń quqyǵyn qorǵaý departamentine shaǵym qaldyrǵan. Sonyń negizinde departament mamandary iri saýda jelisinde jospardan tys tekseris júrgizdi.&nbsp;</p>

Jospardan tys tekseris nátıjeleri boıynsha saýda jelisine «Ákimshilik quqyq buzýshylyq týraly» QR kodeksiniń 193-babynyń 5-bóligi boıynsha qysqartylǵan is júrgizýde 100 AEK (aıyppul somasynyń 50%, 369 200 teńge) mólsherinde aıyppul salý týraly Ákimshilik quqyq buzýshylyq týraly hattama jasaldy. Sonymen qatar, Departament saýda qyzmetine Saýda zańnamasyna saı jumys júrgizý týraly nusqama berdi.

«Osy jaǵdaıdy eskere otyryp, Saýda zańnamasynyń 24-babyna sáıkes satýshy (daıyndaýshy) saýda obektisiniń ishki jáne syrtqy vıtrınalarynda qoıylǵan baǵa japsyrmasynda kórsetilgen qunǵa sáıkes taýardy satýǵa mindetti, al tutynýshy taýardy satyp alýǵa quqyly ekenin esterińizge salamyz», - dedi Pavlodar oblysy boıynsha Saýda jáne tutynýshylardyń quqyǵyn qorǵaý departamentiniń basshysy Dáýlen Qabdushev.

«Saýda qyzmetin retteý týraly» QR Zańynyń 31-baby 1-tarmaǵynyń 2-tarmaqshasyna sáıkes ishki saýda sýbektileri óz qyzmetin júzege asyrý kezinde taýardy jarııa oferta, sharttar nemese ózge de mámileler talaptaryna sáıkes belgilengen parametrler boıynsha satýǵa mindetti.

Sondaı-aq, QR Ulttyq ekonomıka mınıstriniń m.a. 2015 jylǵy 27 naýryzdaǵy №264 buıryǵymen bekitilgen Іshki saýda qaǵıdalarynyń 54-tarmaǵynyń 8-abzatsy negizinde taýarlardy satýdy júzege asyratyn ishki saýda sýbektisi saýda nysanynyń ishki jáne syrtqy vıtrınalarynda qoıylǵan baǵa japsyrmasynda kórsetilgen qunǵa sáıkes taýardy satyp alýshyǵa satady.