Pavlodardaǵy daýyl: jekelegen aýmaqtarda tótenshe jaǵdaı rejımi jarııalanady
Pavlodar oblysynyń aýmaǵynda ekpini sekýndyna 28-30 metrge deıin jetetin daýyl áli de soǵyp tur.
Oblys ákimdiginde aýa raıynyń qolaısyzdyǵyna baılanysty óńirdegi aǵymdaǵy ahýal talqylandy.
«Daýyldyń saldarynan oblystyń úsh qalasynda jáne olardyń aýyldyq aımaqtarynda, sondaı-aq, Aqtoǵaı men Baıanaýyl aýdandarynda 12 áleýmettik nysan men ákimshilik ǵımarattyń, 31 kópqabatty jáne 3 jeke turǵyn úıdiń shatyry men qasbetine zaqym kelgen. Zardap shekken qalalar men aýdandardyń ákimdikterine jedel túrde Tótenshe jaǵdaılar jónindegi komıssııalardyń otyrystaryn ótkizý jáne keltirilgen zalaldy baǵalaý men zardap shekken nysandardy qalpyna keltirý úshin tabıǵı sıpattaǵy jergilikti aýqymdaǵy tótenshe jaǵdaı rejımin jarııalaý týraly qajetti sheshimder qabyldaý tapsyryldy. Elektrmen jabdyqtaý jelilerinde 120 apattyq óshirý oryn aldy, onyń 69-y joıyldy. Qalǵandarynda jumystar jalǵasýda. 68 apattyq brıgada (180 adamnan astam) jáne 62 tehnıka jumyldyryldy»,-dep habarlady oblys ákiminiń baspasóz qyzmetinen.
Aýa raıynyń qolaısyzdyǵy saldarynan 3 adam zardap shekti. Eki adam jaraqat alyp, onyń bireýi aýrýhanaǵa jetkizildi, ekinshisi aýrýhanaǵa jatýdan bas tartty. Taǵy bir áıel adam alǵan jaraqattary saldarynan qaıtys bolǵany týraly buǵan deıin habarlaǵanbyz.
Buǵan deıin Pavlodarda surapyl jeldiń jyldamdyǵy sekýndyna 32 metrge deıin jetkeni týraly týraly jazǵan edik.
Qatty jelge baılanysty Pavlodar oblysynyń barlyq aımaǵynda sabaqtar onlaınǵa kóshirildi.
Al óńirlik tótenshe jaǵdaılar departamentiniń dereginshe 540 sharshy metr tóbe jabyny sógilip, jaryq óshýdiń 28 deregi tirkelgen.