Pavlodardaǵy aýrýhananyń 356 mln teńge qaryzy bar

<p>PAVLODAR. KAZINFORM - Pavlodar qalasyndaǵy №3 aýrýhanyń kredıtorlyq qaryzdary 2023 jyl basynda nebári 8 mln teńge bolsa, qazirgi ýaqytta bul soma 356 mln teńgege deıin óskeni anyqtaldy. Óńirdegi emdeý uıymdarynyń birazynda osyndaı másele baıqalyp otyr.</p>

Bul týraly Pavlodar oblystyq máslıhatynyń depýtaty Mahanbet Amangeldi habarlady. Onyń sózinshe, Pavlodardaǵy №1 qalalyq aýrýhananyń jyl basyndaǵy bereshegi 1 mıllıard 235 mıllıon teńge bolsa, toǵyz aı ishinde oǵan taǵy 700 mıllıon teńgege shyǵyn qosylǵan. Al №3 qalalyq aýrýhananyń bereshegi 2023 jyl basynda 8 mıllıon teńge bolsa, bir jarym jyl ishinde 44 ese ósip, 356 mıllıon teńgege deıin ósti.

Foto: M.Amangeldiniń jeke arhıvinen

 

– Alaıda oblystaǵy emdeý uıymdarynyń qaryzdaryna qatysty másele bul ǵana emes. Mysal úshin byltyr Ekibastuz qalalyq aýrýhananyń kredıtorlyq bereshegi 700 mıllıon teńgeni qurady. Qaryzdyń 50 paıyzy kommýnaldyq qyzmetterden shyqqan. Áleýmettik saqtandyrý qory bul jaǵdaıǵa aralasyp, aýrýhana qoldanystaǵy tarıften úsh ese artyq tóleıtinin anyqtady. Qordyń talqylaýynan keıin kommýnaldyq qyzmetter 2,5 ese tómendedi. Oǵan qosymsha aýrýhanany qarjylandyrý 415 mıllıon teńgege ulǵaıtyldy. Nátıjesinde uıymnyń qaryzy qysqarýy kerek edi. Ókinishke qaraı, atalǵan mekemeniń syrtqy bereshegi 968 mıllıon teńgege deıin ósken, – deıdi Mahanbet Amangeldi.

Depýtat Ǵ.Sultanov atyndaǵy oblystyq aýrýhana men kardıologııalyq ortalyqta eshqandaı bereshektiń joqtyǵyn aıtyp, oń mysal retinde keltirdi.

«Medıtsınalyq jáne farmatsevtıkalyq baqylaý komıteti departamentiniń málimetinshe, emdelýshiler jasaıtyn shaǵymdardyń kópshiligi joǵaryda atalǵan úsh aýrýhanaǵa qatysty. Ádettegideı №1 qalalyq aýrýhana turǵyndar narazylyǵy boıynsha kósh bastap tur. Oblys basshylyǵyna № 1 Pavlodar qalalyq aýrýhananyń bas dárigerin, Ekibastuz qalasynyń bas dárigerin laýazymdarynan bosatýdy, al № 3 Pavlodar qalalyq aýrýhananyń bas dárigerine tártiptik sıpattaǵy sharalar qoldanýdy usynamyn», – deıdi depýtat.

Óńirlik densaýlyq saqtaý basqarmasynyń basshysy Ánýar Buırashevtyń sózinshe, atalǵan medıtsınalyq uıymdardyń kredıtorlyq beresheginen bólek, debıtorlyq bereshegi de bar.

– Toǵyz aıdyń qorytyndysy boıynsha biz bul máseleni tártiptik komıssııaǵa shyǵaramyz. Bas dárigerlerge qatysty tıisti tártiptik sharalardy qoldanamyz, – dedi basqarma basshysy.

Buǵan deıin jedel járdem kólikteriniń tozý deńgeıi boıynsha Pavlodar oblysy aýtsaıderler qataryna kirip turǵany týraly jazǵan edik.