Pavlodarda júrgizýshi jol erejesin 30 ret buzyp, 2 mln teńge aıyppul arqalady

<p>PAVLODAR. KAZINFORM - Pavlodar polıtseıleri qysqa merzim ishinde jol erejesin 30 márte buzǵan Mersedes markaly avtokóliktiń júrgizýshisin qolǵa túsirdi. Kóliktiń ózi Reseıde tirkelgeni anyqtaldy.</p>

Jyl basynan beri jergilikti polıtseıler aıyppuldardy ýaqtyly tólemegeni úshin 42 avtokólikti ustap, aıypturaqtarǵa qoıǵan.

- Mysal úshin Mersedes markaly jeńil kólik tizgindegen júrgizýshi qysqa merzim ishinde jol erejesin shamamen 30 ret buzǵan. Aıyppuldyń jalpy somasy 2 mln teńgeden asty. Keıbir jaǵdaılarda ol jyldamdyqty shamadan tys asyrǵan. Ótken qazan aıynda júrgizýshi Omby tas jolyndaǵy jyldamdyq rejımin buzyp, eldi mekende saǵatyna 93 kılometr jyldamdyqpen júrgen, al ol jerde 60 kılometr jyldamdyqpen júrý ǵana ruqsat etilgen. Mashınanyń ózi Reseıde tirkelgen. Kólik quraly mamandandyrylǵan aıyppul turaǵyna qoıyldy. Azamat barlyq aıyppuldardy tolyǵymen tóleýge mindetti,- deıdi Pavlodar oblysy polıtsııa departamenti ákimshilik polıtsııa basqarmasynyń bastyǵy Borıs Álimbaev.

Eske sala keteıik, Pavlodar polıtseıleri óńirdegi avtojoldardan 3 myńǵa jýyq aqaýdy anyqtady.