Pavlodarda jumyspen qamtý ortalyǵy bıýdjet qarjysyn ysyrap etken

PAVLODAR. QazAqparat - Áleýmettik jumys oryndaryna sýbsıdııa berý, jalǵa beriletin turǵyn úı mekenjaılary boıynsha qonys aýdarýshylardy tirkeý jumystary endigi jerde muqııat qadaǵalanady. Pavlodar oblysy ákimdiginde áleýmettik qorǵaý jáne halyqty jumyspen qamtý salasyndaǵy sybaılas jemqorlyq táýekelderine syrtqy taldaý qorytyndysy shyǵaryldy, dep habarlaıdy QazAqparat.

Sybaılas jemqorlyqqa qarsy qyzmet departamentiniń basshysy Darhan Quraqbaev atap ótkendeı, taldaý nátıjesi boıynsha halyqty jumyspen qamtý ortalyqtarynyń jumysynda 30-dan astam buzýshylyq anyqtaldy.

Mysaly, bıznesti damytýǵa memlekettik grant qarajatyn úshinshi tulǵalardyń shotyna aýdarý, bir qatysýshyǵa eki ret grant berý, sondaı-aq turaqty jumys orny bar tulǵalarǵa grant berý faktileri bar.

Osy buzýshylyqtar úshin 5 adam tártiptik jaýapkershilikke tartylyp, 2 adam qyzmetten bosatyldy.

Áleýmettik jumys oryndary men qoǵamdyq jumysty uıymdastyrý boıynsha 20-dan astam buzýshylyq anyqtalyp, onyń 14-i rastaldy.

Halyqty jumyspen qamtý ortalyqtarynyń 8 qyzmetkerine tártiptik jaza qabyldandy jáne 4 qyzmetker qyzmetinen bosatyldy.

Mysaly, Ekibastuzda jumyspen qamtý ortalyǵy sharýa qojalyqtarynyń birine shyn máninde Qazaqstannan tys jerde bolǵan jáne fermer retinde jumys isteı almaǵan adam jumysqa ornalastyrylǵan.

Bul jaǵdaıda jumyspen qamtý ortalyǵy jumys berýshini aǵymdaǵy jyldyń sońyna deıin 420 myń teńge somasynda zańsyz tólengen sýbsıdııany óteýge mindettedi.

Taǵy úsh azamat is júzinde Ekibastuz jáne Pavlodar qalalarynyń jumyspen qamtý ortalyqtary jumysqa ornalastyrǵan obektilerde jumys istemegen, al, olardyń jalaqysy shamamen 1 mln teńge somaǵa sýbsıdııalanǵan.

Osyndaı faktiler Jelezın aýdanynda da oryn alǵan.

Sonymen qatar, Darhan Quraqbaevtyń aıtýynsha, jumys orny men turǵylyqty jeri boıynsha qonys aýdarýshylardy baqylaý tıisti deńgeıde júrgizilmeıdi.

Osyǵan baılanysty beıindi basqarmaǵa jalǵa beriletin turǵyn úıge sýbsıdııa berý rásimin egjeı-tegjeıli reglamentteý usynyldy.

Óńir basshysy Asaıyn Baıhanov jumyspen qamtý jáne áleýmettik baǵdarlamalardy úılestirý basqarmasyna jáne qalalar men aýdandardyń ákimderine barlyq usynymdardyń sapaly oryndalýyn qamtamasyz etýdi, sybaılas jemqorlyqqa qarsy qyzmettiń mamandaryn tarta otyryp, sybaılas jemqorlyq táýekelderine egjeı-tegjeıli ishki taldaý júrgizýdi tapsyrdy.

Budan basqa, tıisti basqarmaǵa bıznes-jobalardy irikteıtin komıssııa otyrysynda mindetti beınetirkeýdi uıymdastyrý boıynsha usynym ázirleý, sondaı-aq, qonys aýdarýshylar men qandastardyń oblys aýmaǵynda turý-turmaýyna ońtaıly monıtorıng júrgizý tetigin aıqyndaý tapsyryldy.