Pavlodarda joldaǵy qaýipsizdikke nemquraıly qaraǵan mekemeler aıyppul arqalady
Pavlodar oblystyq polıtsııa departamentiniń baspasóz qyzmetiniń málimdeýinshe, jol-kólik ınfraqurylymyn kútip ustaý, jol qaýipsizdigin saqtaý maqsatynda aımaǵymyzdaǵy polıtseıler únemi tekserip otyrady.
Aǵymdaǵy jyldyń 10 aıynda avtojoldarǵa 1240 tekserý júrgizilip, qorytyndysy boıynsha múddeli sýbektilerdiń atyna kemshilikterdi joıý týraly 1255 uıǵarym shyǵaryldy.
- Máselen, joldardy kútip ustaı almaǵan, ondaǵy jóndeý jumystarynyń erejelerin buzǵany úshin 209 laýazymdy jáne zańdy tulǵalar jaýapkershilikke tartyldy. Onyń ishinde 21 – aýyl jáne aýyldyq okrýg ákimderi bar. Olarǵa 6 mln teńgeden astam somanyń aıyppuly salyndy. Mysaly, Sharbaqty aýdanynyń trassasynyń 10 shaqyrymynda tekserý júrgizý barysynda jol qozǵalysyna qaýip tóndiretin kemshilikter anyqtaldy. Fılıaldardyń biriniń 44 jastaǵy dırektoryna qatysty avtojoldardy qanaǵattanarlyqsyz ustaǵany úshin QR ÁQBtK - niń 631-baby boıynsha 10 AEK kóleminde aıyppul salynyp, ákimshilik óndiris qozǵaldy, - dedi Pavlodar oblysy polıtsııa departamentiniń ákimshilik polıtsııa basqarmasy bastyǵynyń mindetin atqarýshy Bákibaı Ahmedıanov.
Sonymen qatar, esep berý kezeńinde 185 temirjol ótpesi tekserilgen. Onda qajetti jol belgileriniń bolmaýy, jaryqtyń durys túspeýi, tósemniń qanaǵattanarlyqsyz jaı-kúıi anyqtaǵan. Osy kemshilikterdi joıýǵa 185 uıǵarym berildi. Temir jol ótpelerin qanaǵattanarlyqsyz ustaǵany úshin 25 laýazymdy tulǵaǵa shamamen 730 myń teńge somasynda ákimshilik aıyppul salyndy.