Pavlodarda joǵalyp ketken áıel 13 kúnnen soń tabyldy

<p>PAVLODAR. KAZINFORM - 26 jastaǵy áıel ákesimen kelispeı qalyp, úıinen shyǵyp ketken. Joǵalǵan ana arada 13 kún ótkende Pavlodar qalasynan tabyldy.</p>

Pavlodar oblysy Ertis aýdanynda turatyn ananyń joǵalǵany týraly quqyq qorǵaý organdaryna ákesi habarlaǵan.

Ákesiniń sózinshe, qyzy 8 qańtar kúni Pavlodar qalasyna ketip, sodan oralmaǵan. Úıde onyń eki kishkentaı balasy qalǵan.

- Polıtsııa qyzmetkerleri men volonter jastar kóp jınalatyn jerlerdi tekserip, qoǵamdyq oryndardyń barlyǵyn súzip shyqty. Barlyq aýmaqtyq polıtsııa bólimderine, sondaı-aq shekara mańyndaǵy aımaqtarǵa baǵdar jiberildi. Qabyldanǵan sharalardyń nátıjesinde arada 13 kún ótkende joǵalǵan adam qalalyq páterlerdiń birinde bolǵany anyqtaldy.

Jas ananyń aıtýynsha, ákesimen kelispeı qalǵanyna baılanysty úıden ketip qalǵan. Turyp jatqan jerin jasyryp, aıtpaǵan, - dedi Pavlodar oblysy polıtsııa departamentiniń krımınaldyq polıtsııa bastyǵy Balǵabaı Qaparov.

Polıtseıler áńgime barysynda áıel adamnyń ózin birtúrli ustaǵanynan kúdiktenip, medıtsınalyq kýálandyrýdan ótkizgen.

Nátıjesinde qanynan opıoıdty metabolıdter túrine jatatyn «tropıkamıd» tabyldy.

Ertis aýdanynyń polıtsııa qyzmetkerleri ákimdik janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi komıssııaǵa jas ananyń tártibi qaralatyn materıal daıyndaýda.