Pavlodarda jylýǵa qatysty shaǵymdar eki esege azaıǵan

<p>PAVLODAR. KAZINFORM &mdash; Pavlodar oblysynda bıylǵy jylý maýsymy bastalǵaly tutynýshylar tarapynan 361 ótinish kelip túsken. Al byltyrǵy sáıkes kezeńde aryz-shaǵymdardyń sany 600-den asyp túsken bolatyn.</p>

Bıylǵy jylý berý maýsymynyń basynda aryz-shaǵymdar aıtarlyqtaı azaıǵany tirkeldi. 

Bul týraly óńirlik energetıka jáne turǵyn úı-kommýnaldyq sharýashylyq basqarmasynan habarlady. Qazirgi ýaqytta oblystaǵy 1220 áleýmettik nysan men kópqabatty 2389 urǵyn úıdiń barlyǵy jylý júıesine qosylǵan.

— Jylýmen qamtýǵa erte daıyndyq jáne jylýǵa erte qosý turǵyndardan túsetin ótinishterdiń azaıýyna áser etti. Qazan aıynyń basynan beri 361 ótinish tússe, ótken jylytý maýsymynyń basynda 660 shaǵym túskeni anyqtaldy. Kelip túsken ótinishterdiń barlyǵy jergilikti turǵyn úı ınspektsııasy bólimderinde qaralyp úlgerdi, - deıdi Pavlodar oblysy energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıypov.

Bıyl Pavlodar, Ekibastuz jáne Aqsý qalalarynda barlyǵy 31 shaqyrymnan astam jeli jóndeldi. Tabıǵı monopolııalar sýbektileri óz qarajaty esebinen uzyndyǵy 2,4 shaqyrym bolatyn jelilerge kúrdeli jáne aǵymdaǵy jóndeý jumystaryn júrgizdi. Júrgizilgen jumystardyń qorytyndysy boıynsha Pavlodar oblysyndaǵy jylý jelileriniń tozýy 80,5%-dan 79,7%-ǵa deıin tómendeıdi dep kútilip otyr.

Eske sala keteıik, QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi.