Pavlodarda jetim balalardy asyrap alýshylardyń sany artýda

ASTANA. QazAqparat - Pavlodarda jetim balalarǵa qamqorlyq tanytýshylardyń qatary kóbeıip keledi, dep habarlaıdy pavlodarnews.kz.

Bul týraly oblystyq pedagogıkalyq sheberlik semınarynda Pavlodar qalasynyń otbasy úlgisindegi balalar aýylynyń dırektory Gúlbaǵda Karımova aıtty.

«2015, 2016 jyldary 15-20 bala qamqorlyqqa beriletin nemese óz úılerine oralatyn, - dedi Gúlbaǵda Karımova. - 2017 jyly 24 bala asyraýǵa tapsyrylyp, 18 bala óz otbasylaryna oraldy. Aqpan aıynyń aıaǵynda ákimshilktiń sheshimi shyqqanda 20 shaqty balany qamqorlyqqa berý josparlanýda. Jetim balalardy asyrap alý ońaı jumys emes. 1-7 aı aralyǵynda ýaqyt ketedi. Bul zat satyp alý emes. Qamqorlyq tanytqan ata-analarǵa balalar jolyǵatyn qıyndyqtar jóninde semınarlar, trenıngtar ótkiziledi».

Ana-tárbıeshi qyzmetin atqarýshy Gúlzat Temirjanovanyń aıtýynsha, otbasylyq úlgidegi aýylda balalardy úlken ómirge daıyndaıdy.

«Aýylymyzda 8 úı bar, - dedi Gúlzat Temirjanova. - Bir úıde 8-9 bala ómir súredi. Ártúrli jastaǵy balalar ortaq otbasynda bir-birine qarap ósedi. Erteńgi kúni óz úıine oralsa da, bireýler asyrap alsa da qysylmasyn dep, ómirge qajettilerdiń bárin úıretýge tyrysamyz. Qyzdardy kóbinese oıý oıýǵa, keste tigýge, tamaq isteýge daǵdylandyramyn».

Otbasy úlgisindegi balalar aýylynyń túlegi Áıgerim Halel tárbıeshileriniń arqasynda óziniń bolashaq mamandyǵyn tańdaǵan.

«Bul aýylǵa baýyrym jáne sińilim úsheýimiz tústik, - dedi Áıgerim Halel. - Ol kezde 9-synyp oqyp júrgendikten kolledjge túsý oıy týyndady. Mamandyq tańdaýda qınaldym. Basshylyqtyń, tárbıeshilerdiń bergen aqyl-keńesteriniń arqasynda men óz mamandyǵymdy tańdadym. Kolledjdi támámdaǵan soń «Qazaqstan Alıýmınııi» AQ-nyń qyzmetkeri atandym. Qazir JOO-da bilimimdi shyńdaýdamyn. Óz otbasymdy qurdym. Sonyń arqasynda qonaqtyq kelisim jasaý múmkindigine ıe boldym. Demalystarda, merekelerde baýyrlarymdy óz úıime alyp ketemin. Olar úıdiń jaılylyǵyn sezingenin qalaımyn. Men sııaqty tirekteri bar ekenin bilsin deımin. Barlyq ujymǵa alǵysym sheksiz. Olardyń baǵyttaýymen ómir súrip jatyrmyz».

Aıta ketelik, qazirgi tańda Pavlodar qalasynyń otbasy úlgisindegi balalar aýylynda 4-18 jas aralyǵyndaǵy 63 bala tárıelenýde.