Pavlodarda jer ýchaskesin munaımen lastaǵan kásiporyn 34 mln teńge aıyppul tóleıdi

PAVLODAR. QazAqparat - Pavlodar qalasynda jer ýchaskesin munaıy bar qaldyqtarmen lastaý faktisi boıynsha qylmystyq is qozǵaldy, dep habarlaıdy QazAqparat.

Ekologııa, geologııa jáne tabıǵı resýrstar mınıstrligine qarasty Pavlodar oblysy boıynsha ekologııa departamentine «Pavlodar oblysynyń tutynýshylar odaǵy» ókilderi Pavlodar qalasynyń Soltústik ónerkásiptik aımaǵynda jer ýchaskesi munaıy bar qaldyqpen lastanǵanyn aıtyp shaǵymdandy.

Oqıǵa ornyna shyqqan kezde departament qyzmetkerleri lastanǵan ýchaskeni anyqtap, topyraqqa taldaý júrgizdi, bul normatıvterdiń 100-den 200 esege artqanyn kórsetti.

Lastanǵan ýchaskeniń aýdany - 1000 m2 asady. Qaldyq kólemi - 104 m3. Ekologııalyq zalal mólsheri – 34 mln teńgeden astam.

Atalǵan fakti boıynsha «Ertis Servıs» JShS-ne qatysty jospardan tys tekserý júrgizildi.

Nátıjesi boıynsha kásiporyn qaldyqtardy kádege jaratýǵa nemese qaıta óńdeýge quqyǵy joq úshinshi tulǵalarǵa quramynda munaıy bar qaldyqtardy zańsyz bergeni anyqtaldy (QR Ekologııalyq Kodeksiniń 283-babynyń jáne 288-babynyń talaptary buzylǵan).

Buzýshylyqtardy joıý týraly tıisti nusqama berildi. Tekserý nátıjeleri protsessýaldyq sheshim qabyldaý úshin quqyq qorǵaý organdaryna joldandy.

Qylmystyq is qozǵalyp, kináli tulǵalar anyqtalyp, tergeý sharalary júrgizilýde.

Ekologııa departamenti buzýshylyqtardy joıý týraly uıǵarymdy onyń tolyq oryndalýy úshin erekshe baqylaýǵa aldy.