Pavlodarda «Jeńis sarbazdary» fotokórmesi uıymdastyryldy

PAVLODAR. QazAqparat - Pavlodarda Ortalyq alańda uıymdastyrylǵan «Jeńis sarbazdary» fotokórmesinde 300-ge tarta maıdanger men tyl jumysshylarynyń sýretteri ilindi, dep habarlaıdy pavlodarnews.kz.

Pavlodarlyqtardyń týysqandarynyń sýretteri ilingen bul kórmeni tamashalaǵandar óte kóp boldy. Ár qala turǵyny kelip, óziniń maıdanger atasyn izdep taýyp, fotoǵa túsip jatty. 300-ge tarta batyrlardyń sýreti ilingen taqtada soǵys jyldarynda habarsyz ketken azamattar men ushqysh, tankıst pen pýlemetshiler de bar.

 

«Meniń ákem Jarylǵasyn Rysmaǵambetov 1917 jyly Baıanaýyl aýdany №1 aýylda dúnıege kelgen. 1942 jyly 15-naýryzda Baıanaýyl aýdandyq áskerı komıssarıatymen Keńes armııasy qataryna shaqyrtylyp, 550-shi atqyshtar polkiniń quramynda úsh aı boıy soǵysty. Keıin, 8-inshi atqyshtar brıgadasyna aýystyryldy. 1942 jyldyń jeltoqsany men 1945 jyldyń qarashasyna deıin 178-atqyshtar polki quramynda soǵysqa qatysty. Atqysh Rysmaǵambetov japon ımperıalısterine qarsy soǵysyp, «Japonııadaǵy jeńis úshin» medalimen marapattalǵan. Tiri bolǵanda bıyl ákem 100-ge keler edi, - deıdi uly Altynbek Rysmaǵambetov.

 

Ortalyq alańda sonymen qatar Keńes Odaǵy batyrlarynyń marapattarynyń kóshirmesi ilingen kórme uıymdastyrylǵan. Munda Mahmet Qaıyrbaev, Ivan Sýptel, Qanash Qamzın, Mıhaıl Kataev, Konstantın Shývalov pen basqa da pavlodarlyq maıdangerlerdiń marapattary jarııalanǵan.