Pavlodarda jelide jalǵan paraqsha quryp, jigitti bopsalap kelgender sottaldy

<p>PAVLODAR. KAZINFORM - Úsh jas azamat tanysý qosymshasyna kirip, qyz balanyń atynan jalǵan paraqsha ashqan. Sóıtip qyzben tanysýǵa kelgen jigitti bopsalap, onyń atyna birneshe nesıe rásimdegen.</p>

Tanysý qosymshasynda 16 jasar Sábına degen qyzben vırtýaldy tanysqan pavlodarlyq jigit alaıaqtardyń quryǵyna túsip qaldy. Belgili bolǵandaı, álgi jalǵan paraqshany úsh jas azamat quryp, qaskúnemdik oılaryn júzege asyrmaq bolǵan.

«Úsheýi álgi paraqshany Sábına Ahmetova degen jalǵan nıkpen tirkegen ári ıesi joq uıaly telefon nómirin engizgen. Jas qyzdyń sýreti pavlodarlyq azamattyń qumarlyǵyn týdyrǵan bolýy kerek. Ol álgi nómirge jazyp, qyzben tanysqan. Keıin ıntımdik taqyrypta áńgime júre bastaǵan. Jalǵan qyzdyń atynan hat jazysyp júrgender jigitti Qamzın kóshesindegi úıdiń syrtyna kezdesýge shaqyrǵan. Kezdesken sátte olar ózderin qyzdyń aǵasymyz dep tanystyra otyryp, kámelet jasyna tolmaǵan qaryndasymyzdy renjittiń, sol úshin seniń ústińnen polıtsııaǵa shaǵym túsiremiz dep qorqytqan. Deıturǵanmen máseleni sheshýdiń ózge joly bar ekenin aıtyp, odan aqsha talap etken. Amaly quryǵan jigit olarǵa tap sol sátte nesıe rásimdegen jáne depozıtindegi barlyq aqshany sheship bergen. Jalpy somasy - 210 myń teńge. Alaıda álgi úsheýdiń biri ekinshi kúni zardap shegýshige taǵy kelip, quny 260 myń teńge turatyn qymbat saǵatty nesıege satqyzyp alǵyzǵan. Onymen qoımaı arada eki kún ótkende qaskúnemder 65 myń teńgege shaǵyn nesıe rásimdeýge májbúr etken», dep habarlady Pavlodar qalasynyń №2 sotynan.

Sot qylmystyq isti qysqartylǵan tártipte qarady. Aıyptalýshylar jasaǵan qylımystaryn tolyqatı moıyndaryna aldy. Sot úsheýine de 3 jylǵa bas bostandyǵynan shekteý túrinde jaza taǵaıyndady.

Eske sala keteıik, Alaıaqtar pavlodarlyq qarııanyń atyna 4 mln teńge nesıe rásimdegen.