Pavlodarda jaz bastalǵaly 5 adam sýǵa batyp ketken

<p>PAVLODAR. KAZINFORM - Qurban bolǵandardyń ekeýi &ndash; bala. Mamandar Ertis ózeni sýynyń deńgeıi jyldaǵydan joǵary, soǵan oraı jaǵajaılardyń túbin tolyqtaı súzip shyǵý múmkin emes ekenin aıtyp otyr.</p>

Oblystyń sý aıdyndarynda shomylý maýsymy bastalǵaly 5 adam sýǵa batyp, kóz jumǵan. Bul týraly óńirlik tótenshe jaǵdaılar departamenti bastyǵynyń orynbasary Qaırat Shaımardenov habarlady.

«Azamattardyń sý aıdyndaryndaǵy qaýipsizdik erejelerin saqtaý boıynsha 5 myńnan astam reıd júrgizdik. Baıqaıtynymyz, kóp adamdar qoǵamdyq jaǵajaılarda alkogoldi ishimdik iship, mas kúıinde sýǵa túsedi. Sońǵy qaıtys bolǵan adamnyń ishimdik tutynyp, sýǵa shomylǵany anyqtaldy. Taǵy bir jaǵymsyz faktor - salqyn sý aıaq sińirleriniń tartylyp qalýyna sebepshi bolady», deıdi departament ókili.

Bıyl jazda Ertis ózenine Shyǵys Qazaqstandaǵy kaskadty sý qoımalarynan qaıta-qaıta sý jiberilip jatqanyna baılanysty ózenniń deńgeıi asa joǵary. Saldarynan óńirde áli kúnge 15 jaǵajaıdyń túbi tolyq tekserilmegen. Mamandar jalpy sany 32 jaǵajaıdy tekserip, 70-ten astam qutqarýshyny daıyndaǵan.

Buǵan deıin Baıanaýyldaǵy Toraıǵyr kólinde aǵaıyndy eki balanyń sýǵa batyp ketkeni týraly habarlaǵanbyz.