Pavlodarda zaǵıptar men nashar kóretin jandar qazaq tilin úırendi
«Kún sáýlesi» jobasynyń avtory, «Ana tili» ortalyǵynyń dırektory Sholpan Kenjıkova qazaq tilin úıretý kýrsy eki aıǵa jalǵasqanyn aıtady.
«Bul jobamdy usynǵan kezde oblys ákimi Bolat Baqaýov birden qoldaý kórsetti, - dedi Sholpan Kenjıkova. - 30 adamdy tórt topqa bólip oqyttym. Kýrsqa arnaıy ádistemelik qural retinde kitap ta shyǵaryldy. Zaǵıp jandarǵa arnalǵan baspanyń arnaıy braıl júıesi bar. Sol júıemen basyp shyǵaratyn prınter quraldary tek orys, aǵylshyn tilinde eken. Qazaq tilinde joq bolǵandyqtan tilderdi damytý basqarmasy qarjy bólip, mamandardy jaldap qolmen basyp shyǵartty. «Kelińizder, qazaqsha sóıleseıik!» atty kitapqa memleketik tildi úıretetin sabaqtar engen. 10 shaqty adam ózge ult ókilderi boldy»,-deıdi ol.
Oblystyq kózi kórmeıtin jáne nashar kóretin azamattarǵa arnalǵan arnaıy kitaphanasynda 30 adamǵa kýrsty aıaqtaǵandary jónindegi sertıfıkattar tabys etildi. «Kún sáýlesi» jobasyna qatysýshy Ásııa Tóleýbaeva orys mektepterine baratyn shóberelerine qazaqsha úıretetinin jetkizdi. - Ózim 72 jastamyn, - dedi Ásııa Tóleýbaeva. - Qazaqsha sóıleı alamyn. Biraq kóp bilem dep aıtýǵa bolmaıdy. Bilmegenimizdi úırendik. Endi nemere-shóberelerime úıretetin bolamyn. Kýrsymyz jaıly ótti. Emin-erkin áńgimelesip, syr shertise otyryp, ótkizilgen sabaqtar arqyly qabyldaý jeńil boldy. Ár sabaǵymyzda sháı iship, án aıtyp kóńil kóterip otyryp úırenýge kiristik. Ustazymyz qysqasha áńgimeler aıtty. Olardy orysshaǵa aýdardyq».
56 jastaǵy Elena Leonteva aty-jóni, mekenjaıynan bastap birneshe sóılemdi qazaqsha aıtatyn dárejege jetip qalǵanyn jetkizdi. - Buryndary da qazaq tilin úırengenmin, - dedi Elena Leonteva. - Qoǵamdastyǵymyz bar. Sol uıymda birneshe kýrstar ótti. Bul jolǵy jobada tereńdetip oqydyq. Jalǵaýlardy, daýysty, daýyssyz dybystardy úırendik. Án aıtyp, óleńder jattadyq. Sózdik qorym edáýir molaıyp qaldy. Birneshe sóılemdi erkin aıta alamyn.
Sondaı-aq «Kún sáýlesi» jobasynyń jetekshisi Sholpan Kenjıkova jobaǵa qatysýshylarmen tabıǵat aıasynda demalýǵa shyǵatyndaryn atap ótti. - Mundaı jandar ózderin eshkimge kereksiz sezinbesin, qoldaýshylary bar ekenin bilsin degen nıetpen tabıǵatqa saıahatqa shyqpaqpyz. Áńgimeleriniń arasynda kóp syrtqa shyqpaıtynyn da estip qaldym. Sondyqtan 24 tamyz kúni kýrsqa qatysýshylarmen Ýsolka shaǵyn aýdany mańyna tabıǵat aıasyna demalysqa shyǵatyn bolamyz, - dedi Sholpan Kenjıkova.
Aıta keteıik, «Kún sáýlesi» jobasy aıasynda kózi kórmeıtin jáne nashar kóretin jandarǵa qazaq tiliniń grammatıkasy, maqal-mátelder, óleńder, áńgimeler úıretildi.