Pavlodarda úsh mektep jańa oqý jylyna daıyn emes

PAVLODAR. QazAqparat - Pavlodardyń №5 mektebinde esikter men eden aýystyrylyp, qabyrǵalar árlenip jatyr. Sondaı-aq jylý jáne elektrmen jabdyqtaý jelileri jańartylyp, akt jáne sport zaldary jóndelýde, dep habarlaıdy QazAqparat.

Oblys ákimi Asaıyn Baıhanovtyń aıtýynsha, mundaǵy jóndeý jumystary oqý jyly aıaqtalýyn tospastan mamyr aıynda bastalǵan. Ol úshin tipti oqýshylardy basqa mektepke aýystyrdy. Endi olardyń 1 qyrkúıekte jańa partada otyrmaý qaýpi bar.

«Merdiger jóndeý jumystaryn ýaqytynda aıaqtaı almaı otyr. Eger ol jumystardy jyldamdatpasa, biz ony josyqsyz jetkizýshi retinde tanýǵa jáne lıtsenzııadan aıyrýdy talap etýge májbúr bolamyz. Búgingi kúni nysandaǵy jóndeý jumystarynda artta qalý baıqalady. Qazirgi ýaqytta oblys ortalyǵyndaǵy jóndelip jatqan 15 mekteptiń ishinde 3 nysan ýaqyty boıynsha artta qalyp otyr. Merdigerler olardyń ekeýinde jumys qarqynyn údetti jáne qazir artta qalǵan jumys kólemine jetip alýǵa tyrysyp jatyr. Meniń talabym - sapaǵa zııan keltirmeý», - deıdi oblys ákimi.

Kúrdeli jóndeýdi ýaqtyly aıaqtalmaı otyrǵan - № 2, 5, 14 mektepter. Bul rette № 2 jáne № 14 mektep merdigerleri jumys qarqynyn údetken.

№5 mekteptiń de merdigeri jumysty ýaqytynda aıaqtap, nysandaǵy jumysshylar sanyn kóbeıtýge jáne birneshe aýysymda jumys isteýge ýáde berdi.

Óńir basshysy memlekettik organdarǵa bul jumysty qatań baqylaýǵa alyp, oqý jylynyń ýaqytynda bastalýyn qamtamasyz etýdi tapsyrdy.

Áıtpese merdigerlerge ákimshilik sıpattaǵy sharalar qoldanylady (lıtsenzııadan aıyrý jáne josyqsyz dep taný).

Sonymen qatar, Asaıyn Baıhanov oblystyń úsh qalasyndaǵy mektepter aýmaǵyna qajetti asfalt tóseminiń kólemin eseptep, kelesi jyly osy jumystardy oblys ortalyǵynyń balabaqshalarynda júrgizilgen jumystar sııaqty júrgizýdi tapsyrdy.

Esterińizge salamyz, bıyl Pavlodar qalasynyń 43 mektepke deıingi mekemesiniń aýmaǵyna asfalt tóseý jumystary júrgizilýde.