Pavlodarda uly Abaı men aqyn Estaıǵa eskertkish ornatylady
Byltyr elimiz ataqty Estaı Berkimbaıulynyń 150 jyldyǵyn keń kólemde atap ótti. Bul úrdis bıyl da jalǵasyn tabýda. Sońǵy 9 jyldan beri kóterilip kele jatqan, kórnekti ánshi, aqyn-sazger, QazSSR-ǵa eńbek sińirgen óner qaıratkeri Estaı aqynǵa arnalǵan eskertkish máselesi oń sheshimin tapty.
- Estaı Berkimbaıulyna arnalǵan eskertkish kópten beri ashyq taqyryp kúıinde qalyp kelgen edi. Oblys basshysy Bolat Jumabekulynyń qoldaýymen, óńirdiń zııaly qaýymdarynyń muryndyq bolýy - men bul másele qaıta kóterilip, oń sheshimin taýyp otyr. Sátin salsa, 2020 jyly Pavlodar qalasynyń kórikti jeriniń birinen Estaı atamyzǵa arnalǵan eskertkish boı kóteretin bolady, - dedi Pavlodar qalasy mádenıet jáne tilderdi damytý bóliminiń basshysy Samal Begalınova.
E.Berkimbaıulynyń eskertkishiniń nobaıyna arnalǵan baıqaýǵa Nur-Sultan, Almaty jáne Qaraǵandy qalalarynan 6 avtordan 9 jumys kelip túsken.
- Búgingi tańda oblystyq komıssııanyń qaraýynda bolyp, usynylǵan 9 jumystyń 3-ýi iriktelip, respýblıkaǵa jiberildi. Tańdalǵan úsh jumystyń bireýi elordalyq Azat Baıarlınge tıesili bolsa, eki jumys almatylyq Danııar Sarbasovtiki. Aıta keterligi, Danııar - Baıanaýyl óńiriniń týmasy, ózimizdiń jerlesimiz. Endigi sheshim - respýblıkalyq komıssııanyń quzyrynda, - dedi Pavlodar qalasy mádenıet jáne tilderdi damytý bóliminiń sektor meńgerýshisi Meıram Nuǵyman.
Estaı Berkimbaıulyna arnalǵan eskertkishti qalalyq saıabaqtyń Estaı – Akademık Bekturov kósheleriniń qıylysatyn tusynda ornatý usynylǵan eken.
Alaıda, óńir basshysy Estaıdyń eskertkishin qalanyń kórikti ári kózge birden túsetin jerine qoıýdy usynǵan. Aldaǵy ýaqytta eskertkish boı kóteretin orynnyń aýysýy bek múmkin. Al ony ornatýǵa bıýdjetten 50 mln teńge bólingen.
Mamyr aıynda ara sózdiń zergeri bolǵan hakim Abaı Qunanbaevtyń 175 jyldyǵyn joǵary deńgeıde merekeleý týraly jarlyqqa el Prezıdenti Qasym-Jomart Toqaev qol qoıyp, Úkimetke birqatar tapsyrma bergeni esimizde. Ol qatarda Abaıdyń eskertkishi joq óńirlerge aqynnyń músinin ornatý da bar edi.
- Aldaǵy ýaqytta Abaı atamyzdyń 175 jyldyǵyn merekeleý boıynsha atqarylatyn ister az emes. Olardyń ishinde eskertkish qoıý máselesi basty nazarda. Jýyrda jarııalanǵan baıqaýǵa Nur-Sultan, Almaty, Aqtóbe qalalarynan jáne Reseı astanasy Máskeýden 9 avtordan 11 jumys kelip tústi. Aımaqtyq komıssııa músheleri olardyń ishinen 3 jumysty tańdap alyp, respýblıkalyq komıssııanyń qaraýyna jiberdi. Mundaǵy tańdap alynǵan avtorlardyń barlyǵy - bas qalanyń músinshileri. Olar - Asqar Nartov, Toqtar Ermekov jáne Baqytbek Muhamedjanov, - deıdi M.Nuǵyman. Sonymen, Abaı Qunanbaıulyna arnalǵan eskertkish oblys ortalyǵyndaǵy Abaı – Krıvenko kósheleriniń qıylysynda ornatylady dep kútilýde. Eskertkish ornatýǵa 70 mln teńge bólingen.
Budan bólek, pavlodarlyqtar Nur-Sultan qalasyna akademık Qanysh Sátbaevtyń eskertkishin syıǵa tartpaq. Qanysh eskertkishi boıynsha da oblystyq komıssııanyń otyrysy ótti. Oǵan 7 avtordan 7 nobaı usynylǵan. Olardyń ishinen nursultandyq Asqar Nartov pen almatylyq Aıdos Búrkitovtiń jumystary tańdalyp alynǵan. Ol da respýblıkalyq komııasynyń qaraýyna jiberilmek.
Atalǵan jumystar boıynsha Pavlodar qalalyq ákimdigi Facebook paraqshasynda bylaı dep habarlama qaldyrǵan:
- Jumys avtorlaryna Qanysh Sátbaevtyń Otanyna sheksiz súıispenshilik, Abaı Qunanbaevtyń fılosofııalyq oıynyń tereńdigi jáne Estaı Berkimbaevtyń janynyń lırıkasyn kórsetý mindettelgen. Kezdesý qorytyndysy boıynsha bolashaq monýmentter jobalarynyń úzdik nusqalary irikteldi, - delingen jazbada.
Mamandardyń aıtýynsha, respýblı-kalyq komıssııasynyń qorytyndysy aldaǵy aptada shyǵýy tıis.
«Baıqaý týraly ǵalamtordan oqyp bildim. Týǵan jerimde qolǵa alynyp jatqan aýqymdy iske óz úlesimdi qosýdy maqsat etip, birden 3 alyptyń eskertkishiniń nobaıyn jasaýǵa kiristim. Qanysh Sátbaevtyń eskertkishine 1, Abaı Qunanbaevqa 2, Estaı Berkimbaevqa 3 jumysymdy jibergen edim. Qazir Estaı atamyzǵa arnap salǵan 3 nobaıdyń ekeýi oblystyq kezeńnen ótken eken. Eger respýblıkalyq komıssııa meniń eńbegimdi baǵalap, týǵan qalamnyń tórinen meniń jumysymdy, ıaǵnı Estaı atamyzdyń eskertkishin ornatyp jatsa, budan asqan baqyt joq!», - deıdi músinshi Danııar Sarbasov.
Avtory Qarlyǵash HAShYMQYZY
foto: saryarka-samaly.kz