Pavlodarda «Uly Dala joryǵy» marafon-báıgesiniń úshinshi maýsymy bastaldy
Marafonnyń ashylý saltanatyna «AMANAT» partııasynyń Atqarýshy hatshysy Dáýlet Káribek, Ulttyq sport qaýymdastyǵynyń prezıdenti Islambek Saljanov, Pavlodar oblysynyń ákimi Asaıyn Baıhanov, marafon-báıgeniń teń uıymdastyrýshysy Álibek Áldeneı, «JORYQ» at sporty federatsııasynyń prezıdenti Baqytjan Turlybekov qatysty.
«AMANAT»-tyń Atqarýshy hatshysy Dáýlet Káribek partııa ulttyq sport túrlerin damytýǵa, sondaı-aq mádenı jáne tarıhı murany nasıhattaýǵa baǵyttalǵan bastamalardy árdaıym qoldaıtynyn atap ótti.
«Ulttyq sportty damytý máselesi árkez Memleket basshysy Qasym-Jomart Toqaevtyń nazarynda. Ulttyq quryltaıda Prezıdent Qazaqstan Uly dala kóshpeli órkenıetiniń tikeleı murageri sanalatynyn jáne biz ózimizdiń mádenı muramyzdy qorǵap, ilgeriletýimiz kerek ekenin atap ótti. «Uly dala joryǵy» báıgesi «AMANAT» partııasynyń qoldaýymen úshinshi jyl qatarynan ótkeli otyr. Marafon-báıge qazaqstandyqtardy biriktiretin, ulttyq rýhty nyǵaıtatyn jobaǵa aınaldy. «Uly dala joryǵy» bizdiń ulttyq biregeıligimizdi saqtap, ilgeriletedi dep senimmen aıtýǵa bolady», – dedi Dáýlet Káribek.
Bıyl 500 shaqyrymdyq marafon-báıge Pavlodar – Astana baǵyty boıynsha ótedi. Oǵan Qazaqstannyń ár óńirinen 19 komanda qatysyp jatyr.
«Uly dala joryǵy» marafon-báıgesin úshinshi ret ótkizip otyrmyz. Bul – azamattar men arǵymaqtardyń tózimi men erik-jigeri synǵa túsetin doda. Barlyq sportshylarymyz osy kúrdeli synaqtan súrinbeı ótip, jorytqanda joldary bolsyn!», - dedi marafonǵa qatysýshylarǵa QR Ulttyq sport qaýymdastyǵynyń prezıdenti Islambek Saljanov.
Komandalar bes kún boıy kúnine 100 shaqyrym jol júrip ótýi tıis. Ár 50 shaqyrym saıyn komandalar men olardyń attaryna demalýǵa múmkindik beriledi. Jylqylardyń jaǵdaıyn tájirıbeli veterınarlar baqylaıdy. Aıta ketý kerek, ár komandanyń jolǵa shyǵý ýaqyty ártúrli. Birinshi komanda saǵat 07.00-de, kelesiler eki mınýt aralyqpen jolǵa shyqty. Nátıjesinde sońǵy komandanyń sapary 07.36-da bastaldy. Komandalardyń qandaı nómirmen jarysatyny jerebe tartý barysynda anyqtaldy.
Komandalar bir-birimen jaryspaıdy, óıtkeni árqaısynyń qozǵalys ýaqyty ártúrli. Barlyq qashyqtyqty eń qysqa ýaqytta eńsergen komanda jeńimpaz atanady.
Eske sala keteıik, «JORYQ» respýblıkalyq federatsııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báıge, kókpar, aýdaryspaq, asyq atý, sadaq atý, jamby atý, teńge ilý, qusbegilik jáne t.b. federatsııalar bar. Qazaqstan Respýblıkasynyń Ulttyq sport qaýymdastyǵyn belgili kásipker, metsenat, «Altyn Qyran Foundation» qoǵamdyq qory Qamqorshylyq keńesiniń tóraǵasy Islambek Saljanov basqarady.