Pavlodarda túrme saqshysy sottalýshynyń qashyp ketýine jol bermedi

PAVLODAR. QazAqparat - Pavlodarda Ulttyq ulannyń áskerı qyzmetkeri qylmystyq-atqarý júıesi mekemesinen sottalǵannyń qashýynyń aldyn aldy, dep habarlaıdy QazAqparat ulttyq ulannyń baspasóz qyzmetine silteme jasap.

16 sáýir kúni saǵat 12:30 shamasynda Pavlodar qalasyndaǵy Qylmystyq-atqarý júıesi-24 mekemesinde ýchaskelerdiń birinde sottalǵandar ishki tyıym salynǵan aımaqqa, baqylaýshylardyń jolyna ótip ketken.

«Kúzetshi sottalǵan azamattyń qashý áreketin baıqap, eskertý jasaǵan. «Toqta! Artqa! Toqta! Atamyn!» dep aıqaılap, dabyl túımesin basqan. Artynsha dereý qaraýyl bastyǵyna habarlap, joǵary qaraı eskertý retinde birneshe márte atty. Sottalǵan adam ishki tyıym salynǵan aımaqta kezekshi qyzmettiń kúshimen ustaldy» dep habarlady Ulttyq ulannyń «Shyǵys» óńirlik qolbasshylyǵynyń baspasóz qyzmeti.

Ýákiletti organdar oqıǵanyń mán-jaıyn anyqtaý úshin jedel-tergeý is-sharalaryn júrgizedi.

Sondaı-aq, Pavlodar oblysy boıynsha qylmystyq-atqarý júıesi departamenti jáne 6679 áskerı bóliminiń komandırimen birlesip qyzmettik tergeý bastaldy.