Pavlodarda Túrkııa elshiliginiń aýyzasharynda 300 adamǵa Quran kitaby berildi

PAVLODAR. QazAqparat - QMDB-nyń Pavlodar oblysy boıynsha ókildigi qasıetti Ramazan aıynyń segizinshi kúni Qazaqstandaǵy baýyrlas Túrkııa eliniń elshligimen birlesip oblystyq ortalyq Máshhúr Júsip meshitiniń úlken ashanasynda 300 adamǵa aýyzashar dastarhanyn jaıdy, dep habarlaıdy pavlodarnews.kz. 

Bul týraly meshittiń baspasóz qyzmeti málim etken. Ókil ımam Joldas Qospaquly aýyzasharǵa jınalǵan qaýymǵa qasıetti Ramazan aıynyń berekesin tileı kele, elimizdegi Túrik elshiliginiń din isteri jónindegi keńesshisi Galıp Akyn bastaǵan elshilik qyzmetkerlerine baýyrlastyq yqylasy, nıet-peıili úshin alǵys aıtty.

Aıta keteıik, dastarhan basyna oraza tutyp júrgen qarapaıym jamaǵatpen qosa arnaıy shaqyrylǵan zaǵıptar qoǵamy músheleri, qalamyzǵa tanymal qadirli atalar men apalar jáne zııaly qaýym ókilderi shaqyryldy. Aýyzasharǵa qatysqan ár adamǵa túrik aǵaıyndarymyz syıǵa tartqan qasıetti Quran Kárim kitaby qoıyldy.


"Qasıetti Quran aıattary oqylyp, el-jurtymyzǵa beıbitshilik, tynyshtyq, amandyq-saýlyq, Ramazan aıynyń berekesin tilegen bata-duǵalarǵa ulasyp, ónerpaz jigitter dástúrli Jarapazannyń da birneshe nusqasyn ártúrli áýendermen oryndap, úlken-kishi qaýymnyń jadyn jańǵyrtty. Jas aqyndar dinı óleńder oqydy. Shat-shadyman kóńil qoshyna bólengen jamaǵat úılerine dastarhan basynan bir-bir Quran kitabyn qushaqtap qaıtty", - deıdi Máshhúr Júsip meshitiniń baspasóz hatshysy Amantaı Toıshybaıuly.