Pavlodarda Tuńǵysh Prezıdent kúni qarsańynda 70-ten astam otbasy baspanaly boldy
Oblys ákimi Bolat Baqaýov úsh jyl buryn osynda kelip, árbir otbasymen kezdesken bolatyn. Aımaq basshysy óz sózinde ýaqytsha baspanaǵa kóshýdi suraǵan turǵyndarǵa jańa baspana salyp, sol jerge kóshiretini týraly aıtqanda kóbi senim bildirmegenin eske saldy.
«Sizderdiń baspanaǵa qol jetkizgenderińiz úshin jáne aınalada qurylys júrip jatqandyǵyna qýanyshtymyn. «Saryarqa» shaǵynaýdanynyń qurylysyn tolyq aıaqtaýǵa taıap qaldyq. Bul aýdandy tolyq abattandyrý úshin eki jyl qaldy. 2021 jyly munda jańa landshaft bolady. Men sizderdi jańa qonystaryńyzmen quttyqtaımyn! Tuńǵysh Prezıdent kúni qarsańynda «7-20-25» tamasha baǵdarlamasy arqyly páter alý baqyt dep oılaımyn. Men elimizdiń Prezıdenti Qasym-Jomart Toqaevqa bizdi qarjylandyryp, qoldap otyrǵanyna alǵys aıtamyn. Al biz óz tarapymyzdyn pavlodarlyqtardyń jaıly ómir súrýi úshin barlyq máselelerdi sheshetin bolamyz. Qonys qutty bolsyn!»,- dedi Bolat Baqaýov.
Shahar basshysy baspanaly bolǵan januıalardyń birine kirip, 11 aılyq búldirshinniń tusaýyn kesti. Turǵyn úıdi JShS «Járdem» merdigerleri «7-20-25» memlekettik baǵdarlamasy aıasynda salǵan. Kóp qabatty eki podezde úıde 71 páter bar.
Búgingi kúni «Saryarqa» shaǵyn aýdanynda 22 turǵyn úı paıdalanýǵa berildi, bıylǵy jyldyń sońyna deıin taǵy 4 turǵyn úı qoldanysqa engiziledi. Sondaı-aq, 2020 jyly qurylysy aıaqtalatyn 4 jańa úıdiń qurylysy júrgizilýde.
Qonys toıyn toılap jatqandardyń biri - Polıtsııa departamentiniń qyzmetkeri Elmıra Shákenova óz qýanyshymen bólisti. «Jubaıymyz ekeýimiz úshin búgin erekshe kún. Óıtkeni biz ózimizdiń úsh bólmeli páterimizdiń kiltin alyp otyrmyz. Osy ýaqytqa deıin ata-anamyzben birge turdyq. Otbasymyzda úsh sábıimiz bar. Bir qyzyǵy, 29 sany biz úshin kıeli san bolyp tur. Óıtkeni, 29 qyrkúıekte egiz sábıimiz dúnıege keldi jáne de 29 qarashada, 29 jasymda, 29-inshi páterdiń kiltin alyp turmyn. Úkimetimiz osyndaı 7-20-25 baǵdarlamasyn iske qosyp, biz sııaqty jas otbasylarǵa qoljetimdi ıpoteka qarastyrǵany úshin rahmet aıtamyn»,- deıdi departament qyzmetkeri.
Aıta ketý kerek, bıyl «Dostyq» shaǵynaýdanynda qurylys jumystary bastaldy. Qazirgi ýaqytta jańa eki kópqabatty úılerdiń qurylysyn «SPK Pavlodar» AQ júrgizýde. Sonymen qatar, 2019 jyldyń sońyna deıin taǵy 3 úıdiń qurylysyn bastaý josparlanyp otyr.