Pavlodarda Tartyl Fest ótedi

PAVLODAR. QazAqparat – Búgin Pavlodarda Týrnıkke tartylýdan Tartyl Fest respýblıkalyq sport festıvali ótedi, dep habarlaıdy QazAqparat tilshisi.

Elimizde Tartyl Fest Qazaqstan Respýblıkasy Prezıdentiniń janyndaǵy «Dara» talanttardy qoldaý qory» QQ qoldaýymen ótkiziledi.

Pavlodar – kezekti týrnır ótetin on jetinshi qala. Festıval ERTIS PROMENADE sahnasynda ótedi.

Uıymdastyrýshylardyń aıtýynsha, tirkeý, salmaq ólsheý jáne qatysýshylarǵa nómirler berý saǵat 09:00-den 12:00-ge deıin júrgiziledi. Festıvaldiń resmı ashylýy saǵat 14:00-de bastalady.

Búgingi keshtiń hedlaıneri tanymal oryndaýshy 2RAR bolmaq.

Tartyl Fest festıvaliniń tártibi Qazaqstannyń barlyq 20 qalasy úshin - ortaq. Qatysýshylar jasy men salmaǵy boıynsha 9 sanatta synǵa túsedi. Oǵan resmı qazylar alqasy tórelik etýde.

10 maýsymda bastalǵan festıval 6 qyrkúıekte máresine jetýi kerek. Qatysýshy 20 qalanyń árqaısysynda 27 jeńimpaz anyqtalady. Olardyń bárine aqshalaı júlde beriledi.

Qala deńgeıinde birinshi oryn alǵan jeńimpazǵa 200 myń teńge, ekinshi orynǵa 100 myń teńge, úshinshi orynǵa 50 myń teńge taǵaıyndalǵan. Qalalyq deńgeıde birinshi oryn alǵan 9 sanattyń jeńimpazdary Nur-Sultan qalasyndaǵy grand-fınalda kúsh synasady. Onyń júlde qory 54 mln teńge.

Al grand-fınal jeńimpazdary Street workout-tan ótetin álem chemıponatyna qatysýǵa múmkindik alady. Jobanyń ambassadory – Aıtym Jaqypov. Ol Street workout-tan birneshe ret Qazaqstannyń jáne álemniń rekordtaryn jańartqan. Al Streetlifting-ten Eýropa rekordsmeni.

Buǵan deıin Tartyl Fest festıvalinde jezqazǵandyq jeńimpazdar anyqtalǵan bolatyn.

Týrnıkke tartylý festıvali jalpy Qonaev qalasynda bastaldy. Keıin Túrkistanda, Taldyqorǵan, Almaty, Taraz, Shymkent, Aqtaý, Qyzylorda, Atyraý, Oral, Aqtóbe , Qostanaı, Petropavl, Kókshetaý qalalarynda jalǵasyn tapty.