Pavlodarda surapyl jel shatyrlardy ushyryp, aǵashtardy qulatyp jatyr

<p>PAVLODAR. KAZINFORM — Pavlodar oblysynyń aýmaǵynda ótken túnnen beri qatty daýyl turyp, ǵımarattar men kommýnaldyq jelilerge zaqym keltirip jatyr. Jeldiń jyldamdyǵy keıbir jerlerde sekýndyna 32 metrge deıin jetken.</p>

Pavlodarda jyldamdyǵy sekýndyna 32 metrge deıin jetetin surapyl jel soǵyp tur. Daýyl saldarynan oblys aýmaǵynda ǵımarattardyń shatyrlary ushyp, aýlalarda ósip turǵan aǵashtar qulaǵan. Keıbir jerlerde qulaǵan aǵashtardyń avtokólikterdi basyp qalǵany týraly beınejazbalar tarap ketti.

109 biryńǵaı baılanys ortalyǵynyń habarlaýynsha, búgin tańerteńnen beri Pavlodar qalasy turǵyndarynan shatyrlardyń ushýy, aýladaǵy aǵashtardyń qulaýyna qatysty ótinish-shaǵymdar tolassyz túsip jatyr.

— Aǵashtardyń qulaýy boıynsha shamamen — 25, al shatyrlardyń zaqymdalǵany týraly 7-8 ótinish tirkeldi. Bizdiń mamandarymyz qabyldap alǵan ótinishterdiń barlyǵy qalalyq turǵyn úı-kommýnaldyq sharýashylyq bólimine birden joldanady. Al bólim óz kezeginde arnaıy brıgadalar shyǵaryp, qulaǵan aǵashtar men shatyr bólikterin jınaý, tazalaý jumystaryn júrgizip jatyr, — dep málimdedi 109 biryńǵaı baılanys ortalyǵynyń dırektory Abzal Qabdrash.

Buǵan qosa búgin tańerteńgilik oblys ortalyǵyndaǵy turǵyn úılerdiń kóbinde ystyq jáne sýyq sý joǵalyp ketti. 109 ortalyǵy bul jaǵdaıǵa qatty jeldiń saldarynan elektr jelisinde aqaý týyndap, sý sorǵylary ajyratylǵany sebep bolǵan dep jaýap berdi. «Vodokanal» kompanııasynyń málimetinshe, qazirgi ýaqytta sý qubyrlary toltyrylyp, qysym qalpyna keltirilip jatyr.

Pavlodar qalasynyń ákimi Hasar Habylbekovtiń aqparynsha, qala kóshelerindegi zaqymdanǵan jaryq qurylǵylary men baǵdarshamdardy, elektr berý jelilerin qalpyna keltirý boıynsha 15 apattyq brıgada, qulaǵan aǵashtardy jınaý boıynsha 10 brıgada jumys istep jatyr. Budan bólek, oblys ortalyǵynda jáne qalaǵa qarasty aýyldarda zaqymdanǵan elektr jelilerin qalpyna keltirýge «PREK» AQ-nyń 18 jedel brıgadasy jumyldyryldy.

Al «Qazgıdromet» RMK Pavlodar oblystyq fılıalynyń basshysy Galına Shpak daýyl erteń tańerteńge deıin jalǵasatynyn jetkizdi.

— Búgin tańerteńgilik jeldiń maksımaldy jyldamdyǵy Aqtoǵaı, Baıanaýyl aýdandarynda tirkeldi, sekýndyna 32 metrge deıin jetken. Bizdiń boljamymyzsha, daýyldyń jyldamdyǵy sekýndyna 33 metrge deıin soǵýy múmkin. Ertis, Sharbaqty, Aqtoǵaı, Baıanaýyl aýdandarynda jeldiń áseri aıryqsha seziledi. Buǵan qosa aldaǵy túnde oblys aýmaǵynda 7 gradýsqa deıin aıazdatýy yqtımal, — dep habarlady mekeme basshysy Kazinform agenttiginiń tilshisine.

Oblystyń birqatar eldi mekenderinde elektr jaryǵynyń óship qalǵany týraly habarlar tarap jatyr.

Óńirlik tótenshe jaǵdaılar departamentiniń baspasóz qyzmeti jeldiń saldarynan týyndaǵan oqys oqıǵalar boıynsha málimetter ázirshe jınastyrylyp jatqanyn, aqparat keıinirek bolatynyn habarlap otyr.

Eske sala keteıik, Pavlodarda kúshti jel saldarynan ústine aǵash qulaǵan áıel jan tapsyrdy.

Qatty jelge baılanysty Pavlodar oblysynyń barlyq aımaǵynda sabaqtar onlaınǵa kóshirildi.