Pavlodarda sý tasqynynan zardap shekken otbasylarǵa demeýshiler 208 mln teńge kómek kórsetken

<p>PAVLODAR. KAZINFORM - Pavlodarda sý tasqynynan zardap shekken otbasylarǵa demeýshiler 208 mln teńge kómek kórsetken. Bul qarajattyń 110 mln teńgesine Jalaýly aýylynda jańadan bes úı salynyp jatyr. Taǵy eki úı jalpy somasy 4,1 mln teńgege satyp alynǵan.</p>

Qazirgi ýaqytta Pavlodar oblysy boıynsha sý tasqynynan zardap shekken turǵyndardyń barlyq ótinimderi tolyq kólemde ótelgen. Demeýshilik qarajat esebinen 120 otbasy jalpy somasy 98 mln teńge ótemaqy aldy. Buǵan qosa atalǵan otbasylarǵa jergilikti bıýdjetterden 100 aılyq eseptik kórsetkish kóleminde birjolǵy kómek tólengen.

- Aqtoǵaı aýdanynyń Jalaýly aýylynda 5 úı jáne Sharbaqty men Tereńkól aýdandarynda 2 úı qalpyna keltirýge jaramsyz dep tanylǵan. Jalaýly aýylynda demeýshi qarajatyna qazirgi kúni 5 úı salyna bastady. Ár baspananyń quny 22 mln teńge turady. Qurylysty aldaǵy úsh aı ishinde aıaqtaý kózdelgen. Buǵan qosa Sharbaqty aýdanynyń Krasılovka aýylynda turýǵa jaramaı qalǵan úı esepten shyǵarylyp, zııan shekken otbasyǵa demeýshi esebinen quny 1,1 mln teńge turatyn ózge baspana satyp áperildi. Al Tereńkóldiń Tomarly aýylynda turatyn otbasynyń úıi de sýdan zardap shekkeni sebepti, demeýshiler 3 mln teńge turatyn baspanany syıǵa tartty. Osylaısha oblys boıynsha jaramsyz dep tanylǵan 7 úıdiń barlyq shyǵynyn demeýshiler kóterip otyr, - dep habarlady Pavlodar oblysy ákimi apparatynyń basshysy Dıdar Ibraev.

Onyń aıtýynsha, aımaqtaǵy turǵyn úılerdi sý basý qaýpi tolyǵymen joıyldy. Oblystyq shtab táýlik boıy jumys istep tur. Joǵaryda atalǵan 98 mln teńge tasqyn sýdan dúnıe-múlikteri, úı tehnıkalary men aspaptary, sharýashylyq ǵımarattary búlingen otbasylarǵa ótemaqy retinde tólengen. Kómektiń eń az mólsheri – 70 myń, al eń kóbi 6 mln teńge bolǵan.

Buǵan deıin Úkimet basshysy Oljas Bektenov tasqynnan zardap shekkenderge turmystyq tehnıka alatyn aqsha da beremiz degen edi.

Osyǵan oraı qarǵyn sýǵa baılanysty tótenshe jaǵdaı jarııalanǵan Jalaýly aýylynda turǵyndardyń ótinimderin jergilikti komıssııa muqııat qarastyryp jatyr. Joǵaryda atalǵan kómekterden bólek, otbasylarǵa aýdan qarajaty esebinen 150 aılyq eseptik kórsetkishke deıin ótemaqy tólenedi dep kútilip otyr.

Pavlodarda sý tasqynynan zardap shekkenderdiń bári ótemaqy aldy.

Eske sala keteıik, Pavlodar oblysy sý tasqynynyń ekinshi kezeńine daıyn otyr.

Buǵan deıin pavlodarlyq eriktiler Aqmola jáne Soltústik Qazaqstan oblystaryna gýmanıtarlyq kómek jetkizdi.

Bıyl tasqyn sýdyń kóptigine qaramastan Pavlodar oblysyndaǵy Aqkól-Jaıylma alqaby nýsyz qalǵaly tur.