Pavlodarda soqqyǵa jyǵylǵan jasóspirimniń otbasyna jan-jaqty kómek kórsetiledi – oblys ákimi

ASTANA. QazAqparat – Pavlodar oblysynyń ákimi Asaıyn Baıqanov Pavlodar qalasyndaǵa tóbeles kezinde zardap shekken jasóspirimniń otbasyna jan-jaqty kómek kórsetýdi tapsyrdy.

Bul týraly oblys ákimi óziniń Instagram paraqshasynda jazdy, dep habarlaıdy QazAqparat.

«Búgin men apparattyq jınalystyń jabyq bóliginde Pavlodar qalasynda oqýshyny jabylyp uryp-soǵý oqıǵasy boıynsha suraqty qozǵadym. Ata-ana retinde men buǵan beı-jaı qaraı almadym, sondyqtan, polıtsııa departamenti men oblystyń bilim basqarmasynyń basshylyǵyna oryn alǵan jaǵdaıdy tergeý barysymen meni habardar etip otyrýdy tapsyrdym. Jınalystan keıin kúdiktiler men zardap shekken balalar oqıtyn mektepterdiń birine baryp, pedagogtarmen sóılestim, memlekettik organdarǵa zardap shekken balanyń otbasyna jan-jaqty kómek kórsetýdi tapsyrdym. Mundaı faktiler bizdiń qoǵamda úırenshikti jaǵdaıǵa aınalmaýy kerek. Ondaı jaǵdaılardy túbimen joıý, balalardy meıirimdilikke, adaldyqqa jáne ádilettilikke tárbıeleý – bizdiń basty mindetimiz»,-dep jazdy Asaıyn Baıqanov.

Aıta keteıik, 24 shilde kúni keshki saǵat 20:30-da Pavlodar kósheleriniń birinde tóbeles bolǵan. Onda 14 jastaǵy jasóspirim zardap shekti, ol oblystyq balalar aýrýhanasyna jetkizildi.

QR Oqý-aǵartý mınıstrligi Balalardyń quqyqtaryn qorǵaý komıteti bolǵan oqıǵa boıynsha pikir bildirdi.

Sondaı-aq atalǵan komıtet osy isti óz baqylaýyna aldy.