Pavlodarda soǵys ardagerleriniń beınesimen bılbordtar ornatylýda

PAVLODAR. QazAqparat - Pavlodar oblysynda Jeńistiń 75 jyldyǵyna oraı ardagerlerdiń sýretterimen 450-den astam bılbord ornatyldy, dep habarlaıdy QazAqparat.

Sonymen qatar, Ekinshi dúnıejúzilik soǵystyń aramyzda júrgen 55 ardageri týraly rolık tórt LED-ekranda kórsetiledi.

Pavlodarda Ekinshi dúnıejúzilik soǵysy ardagerleriniń beınesimen bılbordtar ornatý 24 sáýirden bastaldy. Pavlodar oblystyq aqparat jáne qoǵamdyq damý basqarmasynyń málimetinshe, maıdangerlerdiń portretteri 25 mamyrǵa deıin turady.

«Qalalyq bıýdjet esebinen qurylǵan jáne ornatylǵan 34 bılbordta Sovet Odaǵynyń Batyrlary men Dańq ordeniniń segiz kavaleri beınelengen. Qalǵan bılbordtardy maıdangerlerdiń týystary ózderiniń soǵysta bolǵan ákeleriniń, atalarynyń, aǵalarynyń portretteri bar bılbordtardy óz esebinen jarnama agenttikterimen tikeleı jumys isteı otyryp ornatady. Pavlodarda 300-den astam bılbord konstrýktsııasy ornalasady. Ardagerlerdiń sýretteri beınelengen jáne Jeńistiń 75 jyldyǵyna oraı ilingen bılbordtardyń dızaıny búkil el úshin biryńǵaı logotıppen qala ákimdigimen bekitildi», - dedi basqarmada. Pavlodar oblysynda 55 soǵys ardageri qaldy, onyń 37-i Pavlodarda turady. 5 mamyrdan bastap olardyń portretteri bar rolık Pavlodardyń tórt LED-ekranynda kórsetiledi.

Sonymen qatar, Jeńis kúnine oraı kósheler taqyryptyq bılbordtarmen bezendirilgen. Nursultan Nazarbaev dańǵylynda merekelik jalaýlar ilingen. Búgingi tańda 500-den astam jarnamalyq qurylym ornalastyrylǵan.

Aıta ketsek, bıyl 9 mamyrǵa oraı óńirdegi barlyq soǵys ardagerleri mıllıon teńgeden aldy. Jalpy oblys boıynsha 9 mamyrǵa oraı 459 bılbord ornatyldy. Onyń ishinde: Pavlodarda – 300, Ekibastuzda – 30, Aqsýda – 12, Aqtoǵaıda – 9, Baıanaýylda – 19, Tereńkólde – 8, Aqqýlyda – 14, Maı aýdanynda – 13, Pavlodar aýdanynda – 7, Sharbaqty aýdanynda – 8, Ýspen aýdanynda – 10 jáne Jelezın aýdanynda – 10, Ertis aýdanynda – 19. Pavlodar oblysynda Jeńistiń 75 jyldyǵyna arnalǵan 150-den astam onlaın-shara ótkizý josparlanýda. Jeńis kúnine oraı Baıanaýylda UOS qatysýshylary – Bahyt Qaıdarov, Vasılıı Hrıstenko, Ivan Kýdınkı jáne Jylbek Aǵadilovtiń músinderi qoıylady. Aqtoǵaıda Keńes Odaǵynyń Batyry Serikbaı Mútkenovtiń músini ashylady. Saltanatty shara 2020 jyldyń shilde aıyna josparlanǵan.