Pavlodarda soǵys ardageriniń týystary izdestirilip jatyr

PAVLODAR. QazAqparat – Pavlodar qalasynyń «Maıdan joly» izdeý jasaǵyna Ekinshi dúnıejúzi soǵysyna qatysqan kishi serjant Gennadıı Georgıevıch Kýrbanovtyń Lenıngrad oblysynan tabylǵan gvardııa qutysy tabystaldy. Maıdanǵa Pavlodar oblysynan shaqyrtylǵan jaýynger iz-túzsiz joǵalǵandar tiziminde bolǵan joq, shaıqasta aman qalýy da múmkin, dep habarlaıdy QazAqparat.

«Nur-Sultan qalasyndaǵy «Shyndyqty jetkizý jáne álemdi qorǵaǵandar týraly estelik qaldyrý» halyqaralyq konferentsııasy alańynda «Edelveıs» izdeý jasaǵy (Severodvınsk qalasy, Reseı) komandıriniń orynbasary Aleksandr Şetnev pavlodarlyq «Maıdan joly» izdeý-zertteý jasaǵynyń komandıri Aleksandr Shıtovtyń qolyna QazKSR týmasy Kýrbanov Gennadıı Georgıevıchtiń esimi jazylǵan qutyny saltanatty túrde tabystady», - dep baıandady izdeý jasaǵynan.

2011 jyly «Edelveıs» jasaǵy Naıtolovo aýdanyndaǵy Sharshy alańqaıdaǵy blındajda qutyny tapqan.

Onda «Kýrbanov Gennadıı Georgıevıch 1914 jyly dúnıege kelgen. Qazaq KSR Pavlodar ólkesi. Armııaǵa 1940 jyly shaqyrtyldy» degen jazý bar.

Aleksandr Şetnev baza boıynsha bul sarbazdyń iz-túzsiz joǵalǵandar tiziminde joq ekenin, ol týraly málimetti nagradtaý qujattarynan tapqanyn habarlady.

«Jaýynger 1942 jylǵy qyrkúıekte Sharshyda bolǵan shaıqastan aman qalyp, 1943 jyly Dneprge ótkeni belgili boldy. «Jaýyngerlik erligi úshin» medalimen eki ret marapattalǵan (1943 jáne 1944 jyly)», - dep atap ótti pavlodarlyq «Maıdan joly» izdeý-zertteý jasaǵynyń komandıri A.Shıtov.

Gennadıı Georgıevıch Kýrbanov 1914 jyly dúnıege keldi.

Maıdanǵa Kaganovıch aýdandyq áskerı komıssarıatynan (qazirgi Pavlodar oblysynyń Aqsý aýdany) shaqyrtylǵan.

Úshinshi Ýkraına maıdany 92-shi gvardııalyq atqyshtar dıvızııasynyń 282-shi gvardııalyq polkiniń áskerı bólimine túsken.

Áskerı qyzmetin 1941 jyly bastaǵan.

«Bul sarbaz týraly basqa aqparat joq. Kýrbanov Gennadıı Georgıevıchtiń urystyń qaınaǵan ortasynan aman qalýy da múmkin. Onyń taǵdyryn bilip, týystaryn tapqymyz keledi, jádigerdi jaýyngerdiń úıine tabystasaq eken deımiz», - dep qosyp ótti Aleksandr Shıtov.