Pavlodarda skýter júrgizýshisi ZIL-men soqtyǵysyp, qaza tapty

<p>PAVLODAR. KAZINFORM - Oblys ortalyǵyndaǵy kóshelerdiń birinde skýter ZIL kóligimen soqtyǵysqan. Skýter júrgizýshisi alǵan jaraqatynan oqıǵa ornynda kóz jumǵan.</p>

Bul týraly Pavlodar oblysy Polıtsııa departamentiniń baspasóz qyzmeti habarlady.

«Skýter júrgizýshisi kóshede ZIL kóligimen soqtyǵysqan. Ol alǵan jaraqaty saldarynan sol jerde kóz jumdy. Atalǵan oqıǵa boıynsha tergeý-tekserý sharalary júrgizilip jatyr», - dep málimdedi departamentten.

Buǵan deıin Pavlodarda skýterge mingen eki jasóspirim Kamazǵa soǵylyp kóz jumǵany týraly jazǵanbyz. 

Polıtsııa departamentiniń dereginshe, jyl basynan beri óńirde motokólikterdiń qatysýymen 14 jol-kólik oqıǵasy tirkelip, sonyń saldarynan 4 adam qaza tapqan. Taǵy 14 adam jaraqat alǵan. Oqıǵalardyń teń jartysynda qos dońǵalaqty kólikti kámeletke tolmaǵan jasóspirimder júrgizgen.

Qazirgi ýaqytta Pavlodar qalasy patrýldyq polıtsııa batalonnyń qyzmetkerleri jol-kólik oqıǵalarynyń jáne jol júrý erejelerin buzý faktileriniń aldyn alý maqsatynda, sondaı-aq mopedter men samokattardy paıdalaný bóligindegi zańnama talaptaryn túsindirýge baǵyttalǵan pysyqtaý sharalaryn júrgizip jatyr.

«Bir táýliktiń ishinde 110 skýterdiń júrgizýshisi jaýapqa tartylyp, mıkromobılder arnaıy turaqtarǵa ornalastyryldy. Jas júrgizýshiler negizinen kólikti dýlyǵasyz basqarǵan, sonymen qatar sertıfıkat jáne vin kodtary bar tehpasporty bolmaǵan. Barlyq mototsıkl ıelerine qujattar usynylǵannan keıin ǵana qaıtarylady», - deıdi Pavlodar oblysy Polıtsııa departamenti bastyǵynyń birinshi orynbasary Dýman Qojahmetov.