Pavlodarda sıntetıkalyq esirtkini jasyryn túrde saýdalaǵan kúdikti ustaldy
Esirtki qylmysyna qarsy is-qımyl jónindegi qyzmetkerler sıntetıkalyq esirtkini zańsyz taratqan degen kúdikpen Pavlodar qalasynyń turǵynyn qolǵa túsirdi.
«38 jastaǵy jumys istemeıtin jergilikti turǵyn tyıym salynǵan zattardy qashyqtan satýǵa tyrysqany anyqtaldy. Odan plastıkalyq konteınerler men psıhotroptyq zat salynǵan paketter tabyldy. Azamattyń úıin teksere kelgende álgindeı zattar salynǵan taǵy 43 paket, elektrondy tarazy, kóptegen bos polımerli paket, kompıýter men telefon tárkilendi. Saraptama qorytyndysyna sáıkes alynǵan taýar sıntetıkalyq esirtki bolyp shyqty. Jalpy salmaǵy 40 gramnan asatyn esirtki tárkilendi. Bul asa iri mólsherge jatady», - dedi Pavlodar oblysy polıtsııa departamenti bastyǵynyń orynbasary Bolat Nurseıitov.
Nátıjesinde zańsyz bıznestiń shemasy áshkere boldy. Álgi azamat «Kýrer» dep atalatyn ınternet-messendjerlerde hat almasý arqyly «kýratordan» esirtkiniń iri partııalaryn jetkizý boıynsha nusqaýlar alǵan. Keıin kúdikti esirtkini belgili bir jerlerge jasyryp, ony esirtkige táýeldi azamattar alyp ketip otyrǵan.
Qazir kúdikti qamaýǵa alynyp, atalǵan fakti boıynsha sotqa deıingi tergeý-tekserý sharalary júrgizilip jatyr.