Pavlodarda shetelden kelgen jastardyń UBT-ǵa daıyndyǵy talqylandy
Oǵan óńirdegi úsh ýnıversıtettegi «Foundation» fakýltetiniń daıyndyq bóliminde bilim alyp jatqan jastar qatysty. Qazirgi tańda S. Toraıǵyrov atyndaǵy PMÝ-da 70 bala, PMPÝ men InEÝ-de 50 shaqty bala daıyndyq kýrstarynda bilim alýda. Olar Mońǵolııa, Qytaı, Ózbekstan jáne Reseı elderinen kelgen jastar. Kezdesý barysynda «Dúnıejúzi qazaqtary qaýymdastyǵy» RQB Pavlodar oblystyq fılıalynyń basshysy Bolat Zaýt jastardy tolǵandyrǵan saýaldar týraly surap, aldaǵy turǵan syn saǵatyna sáttilik tiledi.
«Shette turǵan qandastarymyzdyń jaǵdaıy Tuńǵysh Prezıdentimiz Nursultan Nazarbaevtyń esinen bir sátte de shyqqan emes. Mońǵolııa elinen uly kósh 1991 jyly bastalyp, búgingi kúnge deıin jalǵasýda. 1996 jyly shetelde turatyn otandastyrmyzdy qoldaý maqsatynda memlekettik baǵdarlama qabyldanǵan. Sol jyly elimizdiń JOO-da 1000-ǵa jýyq túlek grant negizinde bilim aldy. Byltyr qoldaryńyzǵa attestat alǵannan keıin QR JOO túsý úshin bir jyl tegin daıyndyqtan óttińizder. Kóptegen ustazdar jastardyń áleýmettik jaǵdaılaryna, oqý sapasyna jáne tártibine kóńil bólip, aýqymdy jumys atqardy»,- deıdi Bolat Zaýt.
Nur-Sultan qalasynan kelgen «Otandastar» kommertsııalyq emes aktsıonerlik qoǵamy mádenı-ǵylymı departamentiniń qyzmetkeri Nurymjan Jumaǵazın bilim granttaryna toqtalyp ótti. Onyń aıtýynsha, bul ýaqytqa deıin kvota jalpy respýblıkalyq granttan eki paıyz bólingen bolsa, endigi ýaqytta eki esege artyp, 4 paıyzǵa ósti
«Bul shamamen 1500 oryn. Kvota UBT tapsyrǵan kezde mejedegi baldy jınaı almaǵan jaǵdaıda JOO-ǵa túsýge múmkindik beredi. Biraq shekti baldy jınaý mindetti. Budan basqa, magıstratýraǵa túsý úshin stıpendııalyq baǵdarlama iske qosyldy. Sheteldegi qandastarymyz emtıhanǵa qujattaryn onlaın rejimde tapsyryp oqýǵa túse alady. Olar úshin jatyn orny, stıpendııa qarastyrylǵan. «Otandastar» qoǵamynyń uıymdastyrýymen qazaq tilin damytý maqsatynda álemniń qazaqtar kóp shoǵyrlanǵan 14 qalasynda onlaın klasstar ashý boıynsha jumys júrgizilýde. Saıt arqyly qazaq tilin úırenip, ulttyq salt-dástúr jáne ádet-ǵuryp týraly aqparat alýǵa bolady»,-deıdi Nurymjan Jumaǵazın.
Sondaı-aq, oblystyq ishki saıasat basqarmasynyń basshysy Ernur Dáýenov UBT-ǵa daıyndyqtyń birqatar ádis-tásilderimen bólisti.
Qytaı eli Shyńjań-Uıǵyr avtonomııaly oblysynyń Qulja qalasynan kelip S. Toraıǵyrov atyndaǵy PMÝ-da daıyndyqtan ótip jatqan Ǵalym Erkimbekuly bolashaqta Ertis óńirinde dástúrli ánder mamandyǵy boıynsha bilim alǵysy keletinin aıtady. «2018 jyldyń tamyz aıynda kelgen bolatynmyn», - deıdi ol. «Ertistiń jaǵasyna kelgen kezde eń birinshi ózenniń jaǵasyna bardym. Pavlodar tamasha qala. Qytaımen Qazaqstandy salystyratyn bolsaq, ol jaqtyń ekonomıkasy damyp ketken. Degenmen, Qazaqstanǵa degen erekshe ystyq sezim bolady. Osy ýaqyttyń ishinde Aqsý qalasynda jáne Ýspen aýdanynda ótken jastar arasyndaǵy aıtysta bas júldeger atandym. Bolashaqta osy jaqta bilim alyp, óz elime qyzmet etýdi armandaımyn».