Pavlodarda sheneýnik oralmandardy jalǵan qujatpen aldaǵan

PAVLODAR. QazAqparat - Ekibastuz qalasy ákimdiginiń mamany 31 jer ýchaskesiniń qujattaryn zańsyz berý arqyly memleketke 284 mıllıon teńge shyǵyn keltirdi, dep habarlaıdy «QazAqparat» HAA tilshisi.

Ekibastuz qalasynyń turǵyn úı-kommýnaldyq sharýashylyǵy, jolaýshylar tasymaly jáne avtomobıl joldary bóliminiń mamany Ǵabdolla Shormanov alty jyl boıy tarıhı Otany - Qazaqstanǵa oralǵandarǵa zańsyz  jer qujattaryn usynýmen aınalysyp kelgen. Bul týraly búgin ótken brıfıngte  Pavlodar oblysy boıynsha sybaılas jemqorlyqqa qarsy is-qımyl jónindegi ulttyq bıýro departamentiniń tergeý basqarmasynyń basshysy Rýslan Qýatov málim etti.

«Ol óziniń úı kompıýterinde ákimdiktiń laýazymdy tulǵalarynyń qoltańbalarynyń kóshirmesin jasap, olardy belgili qujattarǵa qoıǵan», - dedi Rýslan Qýatov.

Sybaılas jemqorlyqqa qarsy is-qımyl vedomstvosy ókiliniń aıtýynsha, Ǵabdolla Shormanov bul qyzmetteri úshin ár oralmannan 200 myń teńge alyp otyrǵan.

Shormanovtyń memleketke keltirgen shyǵynynyń jalpy somasy 284 mıllıon teńgeni qurady. Sot oǵan eki jyl jeti aı bas bostandyǵynan aıyrý jazasyn shyǵardy.