Pavlodarda shegirtkege qarsy 100 myń gektar jer óńdeledi

<p>PAVLODAR. KAZINFORM - Bul maqsatqa jergilikti bıýdjetten 138,7 mln teńge bólinip otyr. Hımııalyq óńdeý jumystary aldaǵy aptadan bastalady dep josparlanǵan.</p>

Aldaǵy jaz ystyq bolatyn bolsa, saıaq shegirtkeniń egis alqaptary men shabyndyqtardy jaıpap ketýi yqtımal degen qaýip bar. Jergilikti jaýapty organdar soǵan oraı qam jasap, mamyr aıynyń sońynda hımııalyq óńdeý jumystaryna kirisip ketpekshi.

- Bıyl saıaq shegirtkege qarsy oblys boıynsha 99,8 myń gektar jerge hımııalyq preparattar shashylady. Bul jumystarǵa 138,7 mln teńge bólingen. Zııankesterdi joıýǵa arnalǵan 3033 lıtr suıyq preparat satyp alyndy. Negizgi qaýip Baıanaýyl, Aqqýly, Sharbaqty aýdandarynda bolýy múmkin, soǵan oraı óńdeletin aýmaqtardyń deni atalǵan óńirlerge tıesili. Biz qazir fıtosanıtarııalyq ortalyqtyń shegirtke dernásilderiniń damýyna qatysty boljamdaryn kútip otyrmyz. Bıylǵy kóktemniń salqyn bolyp turýyna oraı shegirtkeniń jetilýi uzaqqa sozylyp jatyr. Aldaǵy dúısenbiden aýdan-qalalar óńdeý sharalaryna kirisip ketýi múmkin, - dedi Kazinform tilshisine bergen suhbatynda oblystyq aýyl sharýashylyǵy basqarmasy ósimdik sharýashylyǵy bóliminiń basshysy Esentaı Múrsálimov.

Óńdeý jumystaryna jeldetkishi bar 16 búrikkish jáne 8 arnaıy qondyrǵy jumyldyrylady.