Pavlodarda sharýanyń úıýli turǵan 50 tonna shóbi órtendi

<p>PAVLODAR. KAZINFORM - Pavlodardaǵy jeke aýlalardyń birinde úıýli turǵan 50 tonna mal azyǵy órtendi. Mamandar tilsiz jaýdyń shyǵý sebebi men keltirilgen shyǵyndy anyqtap jatyr.</p>

Pavlodar oblysy Aqqýly aýdanyndaǵy Qaraqala aýylynda jeke sharýanyń úı aldynda úıýli turǵan shóbi órtendi.

«ÓB-18 bóliminiń órt sóndirýshileri dereý atalǵan mekenjaıǵa baryp, sharýashylyq aýlasynyń aýmaǵyndaǵy jalpy alańy 250 sharshy metr jerde janǵan shóp sóndirildi. Aýmaqta 50 tonna shóp úıilgen. Qyzmetkerlerimiz órttiń ózge ǵımarattarǵa taralýyna jol bergen joq», - dep habarlady Pavlodar oblysy tótenshe jaǵdaılar departamentiniń baspasóz qyzmetinen. 

Foto: Pavlodar oblysy tótenshe jaǵdaılar departamenti

Órt sóndirýge jergilikti atqarýshy organdardyń órt sóndirý beketi, Qaraqala aýylynyń JZQ jáne Chernoe aýylyndaǵy ormanshylyqtyń ormanshylary qatysty. Qazir oqıǵanyń sebebi men keltirilgen shyǵyn eseptelip jatyr.

Buǵan deıin Ertis ormanynda shóp shaýyp júrgen sharýa órt shyǵaryp, qomaqty aıyppul tólegeni týraly jazǵan edik.

Al Baıanaýylda jer órtenip, ot 10 myń gektardan astam aýmaqty sharpydy.