Pavlodarda Sháken Aımanovtyń ómiri jaıynda jazylǵan «Suńǵyla» kitaby jaryq kórdi
«Bul kitapta negizinen ótken ǵasyrdyń 60-70-shi jyldary baspasóz betterinde jaryq kórgen maqalalardy, kitaptardaǵy keıbir estelikterdi toptastyrdyq. Keler urpaq Sháken aǵamyzdyń qandaı adam bolǵanyn, onyń ómiriniń qalaı órilgenin bilsin degen nıetten týyp otyr. Jınaqqa Oljas Súleımenov, Ábish Kekilbaev, Asanáli Áshimov, Bıbigúl Tólegenova, Ákim Tarazı, Áshirbek Syǵaı jáne Sháken Aımanovpen ıyq tiresip jumys istegen ózge de óner qaıratkerleriniń estelik maqalalary endi. Kólemi 345 bet bolyp shyqty. Sháken aǵa qandaı fılm túsirse de, ulttyq qundylyqtardy dáriptegen. Osy erekshelikterdi negizgi ustanym etip, kitaptyń baıanyna sińirdik»,-dep atap ótti kitaptyń qurastyrýshysy, fılologııa ǵylymdarynyń kandıdaty, Toraıǵyrov ýnıversıtetindegi Bekmahanov atyndaǵy ólkeniń tarıhy men mádenıetin zertteý ortalyǵynyń dırektory Amantaı Qudabaev.
Kitaptyń tusaýkeserine oraı Sháken Aımanovtyń 110 jyldyǵyna arnalǵan halyqaralyq ǵylymı-praktıkalyq konferentsııa ótti. Oǵan Pavlodar oblysynyń ákimi Asaıyn Baıhanov, Qazaqstannyń eńbek sińirgen qaıratkeri, kınorejısser, stsenarıst, prodıýser, Qazaq ulttyq óner ýnıversıtetiniń professory Slambek Táýekel, Qazaqstan Respýblıkasynyń eńbek sińirgen ártisi Shahımardan Ábilov, teatr jáne kıno akteri Ergenbaı Ábý jáne Toraıǵyrov ýnıversıtetiniń ǵalymdary qatysty.
Al Buqar jyraý atyndaǵy ádebıet jáne óner mýzeıi Sh.Aımanov pen Káýken Kenjetaevtyń shyǵarmashylyǵy men ómiri jaıynda kórme usyndy.